Tre legar sa opp same dagen

Det opplyser helse- og omsorgssjef Terje Langeland til HF. Måndag i førre veke fekk heradet ei oppseiing frå kvar av dei tre legane, som er sjølvstendig næringsdrivande med eigen legepraksis. To av dei – Gerrit Remeijer og Martin Erdal – er tilsette ved Norheimsund legekontor. Den siste – Jarle Hjartåker – arbeider ved Helsebanken legekontor i Øystese.

Samla har tre tusen pasientar dei tre legane som fastlege. Om seks månader, når oppseiingstida er omme, står desse i utgangspunktet utan fastlege. I mellomtida må Kvam herad rekruttera nye fastlegar. Berre den eine av dei tre, Jarle Hjartåker, kan vera villig til å vera legevikar når fastlegeavtalen går ut, fortel Langeland.

– Me kan koma i ein posisjon der pasientar ikkje har fastlege, men me håpar ikkje at det skal skje. Me har eit ansvar for å syrgja for at me har fastlegar til dei, seier Langeland.

Inntil fem erstattarar

Han orienterte formannskapet om utviklinga i møtet torsdag 7. mars. Han sa at det kan verta naudsynt å skaffa fem nye legar for å erstatta dei tre spesialistane i allmennmedisin. Det vil nemleg vera tilfellet dersom heradet må ty til såkalla LIS-legar – legar i spesialisering – som ikkje kan ha fullt så mange pasientar på listene.

Han stikk ikkje under stol at det kan vera vanskeleg å få tak i nye legar, anten dei vert næringsdrivande med eigen praksis eller fast løna legar i Kvam herad. Bruk av legevikarar, som vil både kosta meir og gje mindre stabilitet for pasientane, kan difor verta naudsynt. Kvam herad er ifylgje Langeland i ferd med å inngå avtalar med vikarbyrå om levering av vikarar i helsetenester. Dette inkluderer fastlegar.

Langeland møtte tidleg i veka kommuneoverlegen og konstituert helseleiar for å leggja ein plan for rekrutteringa på kortare og lengre sikt. Stillingane vert lyste ut med det fyrste.

Helse- og omsorgssjefen påpeika i formannskapsmøtet at dei tre som har sagt opp, anten har fylt 67 år eller snart gjer det. At dei sluttar, er såleis ikkje heilt uventa, men del av eit venta generasjonsskifte.

– Men det er synd at dei har sagt opp samstundes. Det var ikkje eit ynske frå vår side, sa Langeland.

Hemmeleg bakgrunn

Oppseiingane kjem i kjølvatnet av ei politisk sak i formannskapet 25. januar og heradsstyret 1. februar. I vel to timar drøfta heradsstyret bak lukka dører både ei administrativ fullmakt til å tinga om overtaking av Norheimsund legekontor og vilkåra for overtaking av fastlegeheimlar.

Bakgrunnen for at møta vart lukka, var at rådmannen meiner at saksdokumenta rommar opplysingar som kan skada forhandlingsposisjonen til Kvam herad. Desse kunne ha vorte kjende gjennom ordskiftet. Sakspapira vart delte ut og samla inn att i båe møta. Politikarane var såleis ikkje kjende med innhaldet i saka før formannskapsmøtet.

Vedtaket i heradsstyret, mot røystene til Svein J. Stuve (Sp) og Oddvar Brakestad (H), var å gje rådmannen fullmakt til å tinga vidare og sluttføra prosessen med overtaking av legekontoret i Norheimsund frå og med 2025. Vidare vedtok makthavarane at Kvam herad skal retta seg etter rammeavtalen mellom KS og Den norske legeforening «når det gjeld heimfall av fastlegeavtalar ved rekrutteringsutfordringar», og at rådmannen skal «innarbeida vidare subsidiering av basistilskotet til næringsdrivande legar som driv eige legekontor i budsjetta etter 31.12.2024, som eit rekrutterings- og stabiliseringstiltak».

Etter møtet har det vore møte mellom Kvam herad og forhandlingsutvalet til legane om overtakinga av legekontoret. Oppseiingane kom i kjølvatnet av dette møtet, fortalde Langeland i formannskapsmøtet. Kva som ligg bak dei, er ikkje offentleg kjent enno.

Innsynssak dreg ut

HF bad om innsyn i den hemmelege saksutgreiinga 26. januar. HF fekk avslag 2. februar, og klaga på avslaget 16. februar. Klagen, som ifylgje offentleglova skal avgjerast utan ugrunna opphald, er enno ikkje handsama av rådmannen. I klagen viste HF til at paragraf 23 i offentleglova berre gjev rom for å halda opplysningar, ikkje heile dokument, hemmelege.

Oppseiingane frå legane vart ikkje journalførte straks dei vart mottekne av Kvam herad tidleg i førre veke, vedgår konstituert leiar for kommunehelse, Reidun Braut Kjosås.

Ni dagar etter at dei vart mottekne, tok ho spørsmålet om journalføring opp med arkivleiar Trude Birknes Buene. Dei vart onsdag plasserte i personalmapper. Dokument i slike mapper vert ikkje synlege i den kommunale postlista. HF bad om og fekk innsyn i oppseiingane torsdag, den av dei eine i delvis sladda versjon.