Tre bilar kolliderte i Tokagjelet
Ein trailer, ein varebil og ein elbil var innblanda i ei møteulukke fredag kveld. Føraren er fråteken førarkortet, men det er ikkje mistanke om rus.
Det opplyser politioverbetjent Jarle Sjo Myklebust ved Kvam, Samnanger og Tysnes lensmannskontor.
Ulukka skjedde på utsida av Snauhaugtunnelen i retning Norheimsund. Det er 80-sone på strekka. Elbilen kom over i motgåande køyrefelt og trefte ein trailer før han kom over i muren i motsett køyrefelt igjen. I etterkant trefte ein annan bil både elbilen og lastebilen.
Artikkelen held fram under annonsen.
— Det var store materielle skadar. Det kunne gått mykje verre, seier Myklebust.
Naudetatane fekk meldinga klokka 18.09. Båe køyrefelt var stengde fram til klokka 20.30. Då opna eitt køyrefelt. Ein time seinare var vegen rydda og begge køyrefelt opna.
Føraren av elbilen vart send til sjukehus. Føraren var bevisst, og det vart ikkje meldt om alvorleg personskade.
Saka er under etterforsking.
