Tre koronapasientar har vore innlagde på Voss

Sidan 12. mars har sjukehuset utsett operasjonar som kan venta, og avlyst timeavtalar. No skal ein byrja å setta i gang den vanlege aktiviteten att, fortel direktør Olav Lødemel.

– Smitten i dekningsområdet til Helse Bergen er kraftig redusert. Etter scenarioa me no planlegg etter, vil talet vera lågt ei god stund framover, seier han.

Tre innlagde

Det har vore tre pasientar med påvist koronasmitte innlagde på sjukehuset. Alle har vorte friske og utskrivne. Ingen av dei har fått intensivbehandling, men det har vore behov for oksygenbehandling, og innleggingane har vore langvarige.

Dessutan har fire tilsette ved sjukehuset fått påvist smitte. I ein periode var mange tilsette i karantene, men det er ikkje eit stort problem no, fortel Lødemel.

Fredag var det ingen innlagde koronapasientar på Voss.

Tiltak for å hindra smitte og trygga pasientane vert vidareførte. Inngangen til sjukehuset vert kontrollert, og pasientar må møta presist for å unngå å venta på venterom. Kjem det inn pasientar med koronasmitte, skal dei tilsette som behandlar dei, vera separerte frå resten. Pasientar med mistanke om smitte vert isolerte.

Den interkommunale legevakta er flytta ut av sjukehuset.

Lødemel meiner det er heilt trygt å lata seg behandla på Voss sjukehus.

– Det er forståeleg om folk er utrygge, for det har vore mykje fokus på smitte. Men me må ta omsyn til smittefare i lang tid, kanskje heilt til ein vaksine er på plass. Tiltaka me har no, vert langvarige.

Klar for ny bølge

Helseministeren har kunngjort at viruset er under kontroll, barnehagar og skular skal opna igjen, og tiltaka frå regjeringa vert mindre strenge. Lødemel er spent på korleis det vil påverka smittespreiinga.

– Eg vil anta at det vert noko meir smitte enn det har vore. Det er me budde på. Den siste månaden har me hatt god opplæring i og systematisk arbeid med smittevern og pandemi. Me har ein trinnvis plan som legg opp til at me kan ta imot svært mange pasientar ved behov, seier han.

Smitten er slått ned tidleg, og befolkninga har ingen flokkimmunitet. Smitten kan komma tilbake. Difor er det viktig med testing og smittesporing, seier Lødemel.

Kjem dei ei ny bølge, vil det igjen råka den vanlege aktiviteten på sjukehuset.

Må følga situasjonen

Det har vist seg at delen av pasientar som treng intensivbehandling, er noko høgare enn kva som låg i scenarioet frå Folkehelseinstituttet. Helse Bergen har planar for å bygga opp intensivkapasiteten.

Helse Bergen har dessutan større kapasitet og ei meir stabil forsyning av smittevern, medisin og teknisk utstyr enn for ein månad sidan.

– Me har gode scenario i Helse Bergen for om lag ein månad fram i tid, som syner ein stabil situasjon. Men det kan ta to–tre veker før smittespreiing viser seg att i sjukehusinnlegging, så det er viktig å følga smittesituasjonen, så han ikkje kjem ut av kontroll, seier Lødemel.