Travel pusefestival i Odda
Politiet hadde 66 oppdrag under Lothepus-festivalen Sus & Dus i Odda i 7.–10. august. Ambulansetenesta hadde 36 oppdrag knytte til arrangementet.
90 personar vart behandla av Raudekrossen. 56 personar under 18 år vart kasta ut av festivalområdet laurdag.
Det går fram av referatet av eit tverrsektorielt møte der festivalen vart evaluert i Ullensvang rådhus 16. august. Referatet er ført i pennen av rådgjevar for samfunnstryggleik og beredskap i Ullensvang kommune, Stig Hope. Mellom andre politiet, brann- og redningstenesta, teknisk verksemd, Helse Fonna, den kommunale helsetenesta og rådmannen deltok.
Ifylgje referatet meiner helsetenesta at arrangørane må ha ein ambulanse som dei sjølve betalar for til arrangementet. Det vart òg stilt spørsmål om kor mange festivalgjester Odda sentrum kan tola, og om det bør setjast eit tak per dag.
Mellom dei andre betringspunkta som vart nemnde, er tidlegare skiltsøknader og skilting, kart som viser kvar folk kan campa og ikkje, og betre vakthald.
Ullensvang kommune ville fyrst halda referatet unna offentleg innsyn, men endra syn etter ein klage frå HF tysdag.
