Transport og logistikk kan ryka
Kvam vidaregåande skule får truleg ein ekstra klasse i teknologi- og industrifag, men kan mista fleire andre tilbod komande skuleår.
Det går fram av framlegget til justert opplæringstilbod i Vestland fylkeskommune, som yrkesopplæringsnemnda drøfta 9. april. Torsdag 18. april skal hovudutval for opplæring og kompetanse avgjera tilbodet.
Ifylgje framlegget kan skulen i Kvam på nivået VG2 mista ein halv klasse i barne- og ungdomsarbeidarfaget, helsearbeidarfaget, i transport og logistikk (TL), og i industriteknologi.
Til gjengjeld føreslår fylkesdirektøren å auka frå to til tre klassar i teknologi- og industrifag (TIF), der det melde seg 45 såkalla primærsøkjarar. Auken er i tråd med innspel frå Kvam vidaregåande skule, som meiner det er viktig å gripa sjansen. Innspel om annan auke fekk ikkje gjennomslag.
Ordførar Torgeir Næss (Ap) i Kvam herad meiner at TL ikkje bør leggjast ned, berre to år etter at det vart oppretta. Det vil vera eit uheldig signal til næringslivet, som stiller opp med utstyr og kompetanse i faget, meiner han.
– Me byggjer trass alt ny skule i Kvam til nær 500 millionar, og når me er i startfasen av ei ny line som er etterspurd i næringslivet, må me fylgja opp, skriv han i eit innspel ti lemer i utvalet.
Ordføraren sende førre veke ein e-post til lemer i nemnda for å gjera dei merksame på at søkjartalet til transport og logistikk kan vera feil i sakspapira. Det rette talet er sju, ikkje tre, hevda han.
Noko av grunnen, slik han har fått det opplyst av Kvam vidaregåande skule, er at to søkjarar med eit anna, uaktuelt tilbod som fyrsteval, har ført opp TL som andreval.
Innspelet frå Næss vart teke opp av ein av lemene i nemnda. Seniorrådgjevar Åsta Navelsaker Røed opplyste utvalet om at søkjartala omfattar berre dei som har ungdomsrett. Andre søkjarar er ikkje med i grunnlaget for dimensjoneringa av tilbodet, men kan få tilbod om ledige plassar i ettertid, ifylgje Røed.
Det vart ikkje teke til orde for endringar for skulen i Kvam i nemnda.
Les også:
