– Total mangel på respekt for lovverket
Ein mann i Kvam vart fråteken førarkortet for godt i 2022, men det har ikkje stoppa han i å køyra bil.
I midten av desember laut mannen møta i retten att, då han i haust vart tiltala for å ha køyrt bil utan gyldig førarkort og påverka av alkohol. Den tiltala tilstod utan atterhald.
Det same gjorde han då han vart stogga og politibetjenten spurde om han hadde drukke alkohol. Som fylgje av det vart det teke både blåseprøve og blodprøve av føraren. Resultatet synte ein promille på 0,69 om lag 25 minutt etter køyringa.
Hordaland tingrett har dømt mannen til fengsel utan vilkår i 28 dagar og til å betala ei bot på 60.000 kroner. Ifylgje domen fann retten det naudsynt av allmennpreventive omsyn å reagera med både fengsel og bot.
Dette er tredje gongen på tre år at vedkomande er teken for å ha køyrt i rusa tilstand, og den fjerde gongen han har køyrt utan gyldig førarkort.
I 2021 vart mannen frådømd retten til å køyra førarkortpliktig motorvogn i to år og to månader. Året etter vart han fråteken førarretten for alltid etter å ha køyrt bil då han var rusa. Likevel har han vorte stoppa bak rattet tre gongar berre i 2024.
«Han viser med dette totalt mangel på respekt for lovverket og dei omsyn som grunngir vegtrafikklovens reglar om kva vilkår som vert stilt til ein bilførar», skriv domar Anne-Sofie Lutro i domen.
Domen er rettskraftig.
