Torgeir Næss er attvald som ordførar

Val var som vanleg nøkkelordet i det aller fyrste møtet i det nye heradsstyret – det såkalla konstitueringsmøtet – tysdag 17. oktober.

Heilt sidan dagen etter valet har det vore klart kven som ville verta dei fremste gallionsfigurane, ettersom Ap, Frp og KrF stilte seg bak Næss og Nygård. Sidan vart mykje anna avklara i eit møte mellom gruppeleiarane 9. oktober.

– Sunt klima

– Me hadde i utgangspunktet eit ynske om samarbeid med Ap og ville støtta Næss som ordførarkandidat. Det var ikkje ynskt, og Ap har lent seg meir mot Frp og gjort eit kjempegodt val – særleg Frp. Når valet er blitt som det er blitt, er det greitt å ha eit samrøystes val av politisk leiing, sa Gjermund Stuve (Sp).

– Eg er veldig glad for å ha eit samrøystes heradsstyre bak meg, sa Næss, som meiner røystinga stadfestar at det er eit sunt politisk klimaet i Kvam.

Han trur det gode klimaet smittar folket, og trur at få kvemmingar opplever trakassering eller trugsmål i dag. Samstundes er det både lov og viktig å vera usamd i sak, men utan å gå på person, understreka Næss.

Nye leiarar

Varaordføraren – altså Frode Nygård – vert leiar av miljø-, plan- og bygningsutvalet, i tråd med det nye reglementet som vart vedteke tidlegare i år. Even Øyri (Ap) vert nestleiar. Eit framlegg om Odd Valland Bovim (MDG) som nestleiar fekk 12 røyster frå Sp, INP, H, R, SV og MDG. Politisk representant i Kvam ungdomsråd vert Johanne Neteland (Sp).

Valnemnda – som skal finna kandidatar til ymse organ – har tradisjonelt romma gruppeleiarane. Ettersom det no set ti parti i heradsstyret, tok rådmannen til orde for å redusera storleiken til fem lemer og få eit utval som står meir i stil med arbeidsoppgåvene.

Odd Valland Bovim (MDG) meiner det ville gjeve betre breidd om alle gruppeleiarane var med, men føreslo i staden at alle parti skal høyrast før nemnda skal tilrå kandidatar. Nygård påpeika at det kan verta krevjande i praksis, mellom anna av di valnemnda stundom har møte kort tid før saker skal avgjerast av til dømes heradsstyret. Framlegget fekk full støtte.

Fleire av dei mest sentrale vala vart gjennomførte som såkalla forholdstalsval, fyrst og fremst for å kunna stetta lovkrava om kjønnsbalanse best mogeleg. Valet inneber at partia kvar for seg eller saman fremjar lister, og at plassane vert fordelte ut frå den samla oppslutninga partia bak listene fekk i valet.

Representantane

Slik vert nokre av dei viktigaste politiske organa dei neste fire åra samansette (berre faste lemer, ikkje varalemer):

Formannskapet: Torgeir Næss (Ap), Linda Haugland Jondahl (Ap), Frode Nygård (Frp), Gry Merethe Kyrkjeeide (Frp), Arne Sandven (H), Karina Hoff (H), Gjermund Stuve (Sp), Jostein Moldsvor (KrF) og Geir Madsen (SV).

Miljø-, plan- og bygningsutvalet: Frode Nygård (Frp, leiar), Eilen Rykkje (Ap), Even Øyri (Ap, nestleiar), Marta Gravdal (KrF), Gunnar Kvandal (Frp), Arne Opsahl-Engen (H), Helena Bru (Sp), Stig Aase (Sp) og Odd Valland Bovim (MDG).

Kontrollutvalet: Trygve Vik (Sp, leiar), Borghild Storaas Ones (Ap, nestleiar), Jan Ove Fredheim (Frp), Beate Gauden (MDG) og Bjarte Helland (INP).

Kvam eldreråd: Gjermund Stuve (Sp), Martha Rykkje, Åshild Bekkesletten, Kåre Rise og Nils Otto Yndestad.

Rådet for menneske med nedsett funksjonsevne: Odd Valland Bovim (MDG), Brita Træbakken, Marit Heidi Seim, Per Magne Normann, Inge Augestad, Siv Håbrekke og Hans Atle Soldal.

Klagenemnd: Annlaug Tolo (H, leiar), Even Øyri (Ap, nestleiar) og Håvard Gjerde (R).

Administrasjonsutval: Frode Nygård (Frp, leiar), Linda Haugland Jondahl (Ap), Karina Hoff (Ap), Gjermund Stuve (Sp, nestleiar) og Jostein Moldsvor (KrF).

Valstyre: Torgeir Næss (Ap, leiar), Frode Nygård (Frp, nestleiar), Arne Sandven (H), Anne Marie Øvrevik (V) og Marta Bergesen Gravdal (KrF).

Valnemnd: Frode Nygård (Frp, leiar), Linda Haugland Jondahl (Ap), Jostein Moldsvor (KrF), Anne Marie Øvrevik (V) og Gjermund Stuve (Sp, nestleiar).