Tomtesal er sett på vent
Salet av næringstomta i Jondal sentrum vart stoppa i kommunestyremøtet i Ullensvang onsdag.
Formannskapet tilrådde å selja næringstomta til Tore Eiken sitt nye selskap, Tbm Maskin AS, men slik vart det altså ikkje.
– Me meiner det er rett å sjå på eit eventuelt sal gjennom ein sentrumsplan. Det er andre næringstomter i Jondal som kan brukast, sa Jørund Kvestad (Sp) då han presenterte eit fellesframlegg frå Sp, R, INP, SV og KrF i møtet.
Framlegget gjekk ut på å stoppa salsprosessen og vurdera saka igjen i samband med arbeidet med sentrumsplanen for Jondal. I den nyleg vedtekne planstrategien er det lagt opp til arbeid med planen i 2025 og 2026.
– Me har ikkje ei plikt til å selja tomta no, poengterte Kvestad.
Framlegget vart vedteke med 18 mot 15 røyster. Ap og H røysta mot. Eit tilleggsforslag frå Terje Kollbotn (R) om å be rådmannen finna ei alternativ tomt til verksemda vart nedstemt.
Fjellhall?
Det vart i desember i fjor vedteke å selja den aktuelle tomta til Hardanger Maskin AS, men sidan vart verksemda slegen konkurs. Tbm Maskin kjøpte konkursbuet, men fekk ikkje tomta med på kjøpet. Sjølv om vedtaket var på plass, vart ikkje salet ordna formelt før konkursen.
Ordførar Roald Aga Haug (Ap) meiner at den nye verksemda bør få kjøpa tomta.
– Dette er ei næringstomt som er avsett til verdiskaping. Me har mange gongar lært oss at når me lagar arealplanar, så er det der me skal styra arealbruken, sa han i debatten.
Haug poengterte at tomta er rasfarleg, og at ho uansett ikkje kan nyttast til stort. Tbm Maskin er ein av få aktørar som faktisk kan bidra til lokal verdiskaping ved bruk av tomta, hevda han.
Kristian Bondhus-Jensen, kommunalsjef for kultur, næring og samfunn, opplyste at kommunen ikkje har detaljkart for skredfare, men at det er bestilt. Tomta ligg uansett i eit såkalla aktsemdområde for skredfare.
Kollbotn, som nyleg hadde vitja tomta, sa det ikkje var mykje verdiskaping, men lagring å sjå der. Dessutan overraska det Raudt-politikaren at det både i formannskapet og kommunestyret vart nemnt at det er planar om ein fjellhall knytt til tomta.
– Har det vore ein dialog med kommunen om det? Og med grunneigarane, som eig fjellsida? spurde han, utan å få svar.
– Uvanleg ufint
I eitt av innlegga til ordføraren avslutta han med å seia at ulike politikarar i ulike parti hadde gjort han merksam på uvanleg ufine tilbakemeldingar frå enkelte som ikkje ynskjer at Tbm Maskin skal få tomta.
– Det har også, ifylgje Tbm Maskin, vorte gjort hærverk på deira utstyr. Det er meldt til politiet, hevda Haug.
Uavhengig av sak og syn oppmoda han politikarane om å ta kontakt om dei vert utsette for uakseptable tilbakemeldingar i politiske saker.
Kollbotn sa i eit seinare innlegg at han hadde vorte kontakta om saka, men at han hadde opplevd kontakten som ryddig og sakleg.
– Vart erklært habil
Då saka var oppe i formannskapet 28. november, var mellom andre Eirunn Lothe Midtun (Ap) på talarstolen. Etter møtet hevda den eine parten i saka at Midtun er inhabil på grunn av at mannen hennar tidlegare har jobba for Eiken, og at tanta hennar er gift med far til entreprenøren.
Habilitetsspørsmålet vart såleis teke opp i kommunestyret. Rådmann Ole-Jørgen Jondahl opplyste at det ikkje er noko som talar for at Midtun er automatisk ugild etter forvaltingslova, men at kommunestyret måtte vurdera om «andre særegne forhold» tilsa det motsette. Rådmannen meinte at ho kunne delta i debatten.
– Eg synest dette er eit grensetilfelle, sa Terje Kollbotn (R), og refererte til at Midtun gav formannskapet informasjon som ikkje var å finna i saksopplysningane.
– Dette er eit halmstrå som er så tynt at det knekk med ein gong ein tek i det, sa Vidar Solvi (Ap), som meiner meiningsmotstandarane nytta habilitet for å prøva å setja Midtun ut av spel.
Midtun vart erklært habil med 30 mot dei 2 røystene til R, men denne gongen tok ho ikkje ordet i saka.
HF gjer merksam på at far til Tore Eiken er gift med mor til redaktøren i HF. Red.
