Tømmestasjon kan få full pott
Det er rett å bryta prinsippet om å yta berre halvparten av kostnadene for nett dette tiltaket, meiner formannskapet.
Varaordførar Frode Nygård (Frp) meiner det er rett å fullfinansiera tømmestasjonen Øystese Mek Verksted AS planlegg ved Esso-stasjonen i Øystese. Det inneber ei løyving på 450.000 kroner. Rådmannen har tilrådd å gje 200.000.
Han meiner det er innanfor det politiske handlingsrommet å avvika frå føringane for bruk av kraftfondet, som seier at berre inntil halve kostnaden med eit tiltak kan dekkjast med fondskroner.
– Eg er klar over at det kan vera kontroversielt å støtta eit tiltak hjå ein privat næringsdrivande 100 prosent, sa han.
Han viste til at tilbodet ikkje finst andre stader. Kommunane er pålagde å ha minst eitt slikt tilbod. Nygård meiner elles at ein burde ha tenkt på dette då reinseanlegget vart bygt, men slo fast at det er for seint no.
Arne Sandven (H) meiner Kvam herad uansett vil spara pengar ved at ein privat aktør tek seg av den lovpålagde oppgåve.
Gjermund Stuve (Sp) meiner tilboda til campingturistane ikkje er særleg godt i Kvam.
– Dette er eit kjempetilbod, sa han.
Sandven tok til orde for å oppmoda søkjaren om å leggja til rette for at turistane kan kvitta seg også med gråvatn, ikkje berre innhaldet i septiktanken. Det rådde ei viss forvirring kring i kva grad dette er planlagt i same venda.
