Tommelen med for nytt alpinanlegg
Unni Ellefsen og Erik Bjerring Hansen seier nei til både hytter høgare enn 500 meter over havet og til eit nytt alpinanlegg i Byrkjefjell.
For å ta vare på naturen bør ein vurdera å innskrenka byggjegrensa i dei hytteområde som i dag har opning for bygging over 500 meter, skriv dei i eit innspel til kommunedelplanen for Kvamskogen. Dei meiner alpinanlegget i Byrkjefjell vil medføra både vegbygging og nye hyttefelt mot Steinskvanndalen.
– Eit anlegg her vil gripa inn i eit av dei viktigaste natur- og friluftsområda på Kvamskogen, skriv dei.
Likeins er dei skeptiske til eit framlegg frå Kvamskogen Vel, der båe har ei fortid i styret, om eit skitrekk mellom Kleiva og Måvotsheia. Anlegget vil gje inngrep i eit ikkje utbygt område som ein bør ta vare på, meiner duoen. Dei to føreslår samarbeid med Eikedalen Skisenter om utvikling anlegget i Eikedalen som eit betre alternativ.
Ellefsen og Hansen meiner skiløyper må sikrast i møte med bilvegar, slik at ein sikrar allmenn ferdsle på ski. Kring løypenettet bør det vera ei buffersone. Dessutan bør heradet etter deira syn gjera avtalar med grunneigarane om å preparera fleire løyper og rundløyper i turområde bak hyttefelta, særleg ved Fossdal, men også ved Hjeltelivegen og Mødal.
