– Tomme hus er ein ressurs
Mange hus står tomme i Ullensvang kommune, skriv Lisa Karine Haugland (R) i ein interpellasjon til kommunestyremøtet 13. desember.
Mange av husa er mogne for oppussing og ny bruk. Andre er falleferdige rivingsobjekt. Dei falleferdige husa er skjemmande for både naboar og besøkjande, i tillegg til at dei kan vera til skade for menneske og miljø, skriv Haugland.
Huseigarar er etter plan- og bygningslova pliktige til å halda byggverk i forsvarleg stand, legg ho til.
Dei tomme husa er ein viktig ressurs for kommunen, innbyggjarar og dei som ynskjer å flytta hit. Det trengst ei totaloversikt over tomme hus, ein plan og tiltak for opprusting og ny bruk, meiner Haugland.
Kommunen har i plan- og bygningslova heimel til å gripa inn anten gjennom pålegg om tiltak for å avverja fare eller vesentleg ulempe eller om sikring eller riving og fjerning.
Haugland føreslår at kommunestyret vedtek å be rådmannen om å skaffa eit samla oversyn over alle tomme hus og laga ein plan for opprusting, ny bruk eller sanering, og i tillegg å forma ei ordning for tilskot og rådgjeving knytt til tiltaka.
