– Opnar tidlegast tysdag

Snøskred sperrar fylkesveg 49 i Tokagjelet måndag. Politiet oppmodar folk om ikkje å køyra dit.

Vegtrafikksentralen melde frå om skredet klokka 06.37.

Politioverbetjent Jarle Sjo Myklebust ved Kvam politistasjon oppmodar folk om ikkje å køyra i Tokagjelet medan vegen er stengd. Politiet kom til staden for å få bilistar bort frå området, melde Vegtrafikksentralen vest klokka 07.50. Då var entreprenøren komen til staden.

Klokka 11.45 melde sentralen at vegen vert stengd minst til klokka 17, på grunn av den kraftige nedbøren. Klokka 13.35 kom beskjeden om at neste vurdering var flytta til klokka 10.00 tysdag.

Også tidlegare natt til måndag var vegen i Tokagjelet sperra, fyrst heilt og så delvis, etter snøskred. Ikkje før hadde entreprenøren rydda vegen, så kom altså neste skred.

E16 vart stengd mellom Trengereid og Vossevangen på grunn av skred, flaum og skredfare måndag morgon, ifylgje Vegtrafikksentralen. I tillegg er ei lang rekkje andre vegar på Vestlandet stengde.

Styresmaktene oppmodar alle om å lata bilen stå dersom dei kan.