Tok til på ein ny og ukjend kvardag: – Eg er litt redd
Onsdag morgon var uteamfiet ved Norheimsund skule fylt med vaksne og born i ulike aldrar. Skuleranslar i alle fargar og fasongar var å skimta på området. Fyrste skuledag var eit faktum.
– Eg trur det blir veldig kjekt å gå på skulen, seier Marie Valland.
Ho er seks år gamal. Onsdag hadde ho sin aller fyrste skuledag. Saman med veninna Iben Naterstad Dulsrud, som også er fyrsteklassing i år, venta ho spent på at dagen skulle byrja.
Blanda kjensler
Båe hadde kvar sin nye skuleransel i lilla og rosa fargar på ryggen. I dei låg mellom anna regnklede, matpakke og nokre bøker, fortel dei.
Overgangen frå barnehage til skule tykte dei var spanande og morosam, men litt skummelt var det òg, innrømmer Iben.
– Eg er litt redd. Det er så mange folk her, seier ho.
Det dei gledde seg aller mest til, var å leika ute på skuleområdet. Og tanken på lekser skremde dei ikkje.
– Eg trur det vert kjekt, eg, fortel Marie.
Dei to jentene er to av dei 53 elevane som byrja i 1. klasse på barneskulen i Norheimsund. Dei er fordelte på to klassar og fire kontaktlærarar.
Sjå bilete frå skulestarten:
Ny rekord
Dei ferske elevane starta dagen saman med føresette, elevar og tilsette ved skulen. Tradisjonen tru vart det både flaggheising og song. Då enkelte verka framleis å vera i feriemodus, og gjerne var litt ekstra trøytte på morgonkvisten, var det i hovudsak musikkanlegget og eit utval elevar og tilsette ved skulen som stod for musikkinnslaget.
Rektor Svein Sekse ynskte alle velkomne til eit nytt skuleår. Han oppmoda elevane til å bidra til at alle har det godt på skulen ved å vera greie med, passa på, hjelpa og støtta kvarandre. Rektoren vonar at elevane vil få eit normalt skuleår, utan restriksjonar.
I år er det 306 elevar ved skulen, som er ny rekord, opplyser Sekse. Ifylgje han er det kring 40 fleire elevar enn det ein tok høgd for då skulebygget vart teikna.
Løysingsorienterte
Rektoren fryktar ikkje at rekorden skal by på store utfordringar. Han viser til at elevtalet tidlegare år har vore mellom 280 og 294, og fortel at det allereie er gjort fleire tiltak på skulen for å frigjera mest mogleg plass til elevane. Mellom anna har det vorte laga til nye, alternative garderobar, slik at færrast mogleg er samla i same område. I tillegg hengjer alle elevane ranselen frå seg på knaggar i gangen. Då vert det frigjort meir plass i klasserommet, påpeikar Sekse.
Dei siste åra har leiinga også gjort endringar når det gjeld bruk av uteområdet. Medan elevane tidlegare har vore fordelte på ulike stader til same tid, legg timeplanen no opp til at 1.—4. trinn og 5.—7. trinn har friminutt til forskjellige tider. Såleis har elevane eit større område å boltra seg i, ifylgje rektoren.
Til saman 110 fyrsteklassingar i Kvam hadde sin fyrste skuledag onsdag, opplyser leiar for skule, Inga Lill Jensen Tolo. I Jondal byrjar ikkje dei 11 fyrsteklassingane og resten av elevane på skulen før måndag 22. august.
