Tok til orde for sykkelpolitikk

Mellom dei skisserte tiltaka i «sykkelframlegget» i budsjettmøtet i heradsstyret 12. desember var økonomisk godtgjersle per sykla kilometer i arbeidssamanheng.

Om ein skulle differensiera betalinga mellom brukarar av vanlege syklar og av el-syklar, sa framlegget ingenting om. Andre aktuelle tiltak kan vera sykkelskur og sjølvbetente sørvisstasjonar.

– Auka bruk av sykkel kan sjåast som eit folkehelsetiltak, miljøtiltak og eit tiltak for å dempa presset på parkeringsareal, heiter det i framlegget, som vart avvist av fleirtalskoalisjonen.

Sykkelpolitikken vart del av debatten om eit anna punkt i opposisjonsframlegget: å utsetja den såkalla utomhusplanen med parkeringsplassar ved Kvam rådhus på ubestemt tid for å spara ti millionar investeringskroner.

Geir Madsen (SV), sjølv ivrig syklist, meiner at dersom ein parkeringsplass kostar 150.000–200.000 kroner, skal det ikkje så mange sykkelfrelste til før det er mykje pengar og areal å spara.

– Då er det verdt å greia ut og kanskje verdt det å rett og slett betala for å sykla, sa Madsen.

Linda Haugland Jondahl (Ap) meiner det er ein utopi å tru at mange nye sykkelplassar vil redusera trongen for parkeringsplassar. I dag, fortalde ho, er situasjonen slik at ymse former for parkering skapar farlege situasjonar og frustrasjon kring Norheimsund skule, der ho sjølv er rektor.

Varaordførar Frode Nygård (Frp) meiner at nye parkeringsplassar vil styrkja næringslivet ved å frigjera parkeringsplassar i sentrum. Han minte vidare om at idrettsplassen på Haugamyr, som i dag vert nytta til parkering, er leigd ut til idrettslaget gjennom ein langtidsavtale. Dessutan, ifylgje han, skal steinmassar frå arbeidet ved rådhuset nyttast til avkøyrsle ved Toloheimen for å opna for ny bustadbygging på Tolo.

– Det kom ikkje som noko sjokk at Frp vil prioritera parkeringsplassar. Eg er av den oppfatning at ei slik investering ikkje nødvendigvis skapar meir bulyst, sa Odd Valland Bovim (MDG).