Tok til orde for nedlegging
Ungdomsrådet i Kvam stiller seg bak nedlegging av skulen i Tørvikbygd frå og med komande skuleår.
Dimed har rådet endra standpunkt, går det fram av fråsegna til budsjettframlegget som politikarane i Kvam drøfta før jul.
Ser andre argument
Tidlegare i haust argumenterte rådet nemleg mot nedlegging og for å danna ei arbeidsgruppa som skal drøfta korleis ein kan sikra skulen.
Rådet legg vekt på at foreldrearbeidsutvalet ynskjer nedlegging, av omsyn til det psykososiale miljøet, og at nedlegging kan vera fornuftig i den økonomiske stoda heradet er i.
Dei unge meiner elevane bør gå på den same skulen i heile skuletida, slik at dei slepp å verta splitta. Elevar i 1.–4. klasse bør elles få ei eiga transportordning for at dei skal kjenna seg trygge på skulevegen, meiner rådet.
Andre ynske
Rådet tok elles til orde for mellom anna leksefri skule, god tilgang på pc-ar og internett på skulane, kursing av lærarar i digitale verktøy og bruk av kunstig intelligens i opplæring, servering av mat, bli-kjent-tiltak i overgangen mellom barne- og ungdomsskulen, meir tilgjengelege helsesjukepleiarar, tilgang på sanitære produkt og framleis satsing på miljørettleiarar i skulen.
Andre ynske frå dei unge politikarane var ei budsjettramme for ungdomsrådet på minst 200.000 kroner, fleire kinofilmar for ungdomar, samtalegrupper på skulane, fleire uformelle møtestader, framleis skulefritidsordning i ferien, heilårsope «milliontoalett» ved Tyrvefjøra i Ålvik, framhald av fritidskortet utan kutt og berre sommarstenging av bassenga i Ålvik og Strandebarm.
For å spara pengar, tok rådet til orde for berre eitt barnehageopptak i året, bruk av kraftfondet til finansiering av fritidskortet, og ettermiddagsmøte i formannskapet og miljø-, plan og bygningsutvalet.
Fekk ros
Eit stort fleirtal av ynska vart vel å merka ikkje tekne til fylgje av heradsstyret, men fleire skrytte av ungdomsrådet for å koma med gode innspel og gjera ein god jobb med budsjettet.
Ordførar Torgeir Næss (Ap), til dømes, rosa Hallvard Valland Nordheim og Alexander Nicholas Nordlinder Nitter for utførleg arbeid etter at dei hadde presentert synspunkta på vegner av dei unge i Kvam.
