Tok sjøaktivitetssenteret i Strandebarm i bruk
Sjølv om sjøaktivitetssenteret i Strandebarm ikkje er heilt ferdig, er det allereie aktivitet der. Laurdag lærte til dømes ein gjeng seg å bruka kajakkar.
Padleinstruktør Kyrre Flotve frå Sotra var kursleiar. Han fortel at om lag halvparten av kursdeltakarane har padla kajakk tidlegare. Resten var nybyrjarar.
– Me byrja kurset med teori og gjekk gjennom utstyret og korleis det fungerer. Så sette me kajakkane på sjøen og øvde på manøvreringsteknikkar. Me avslutta med tryggleik i kajakk. Mellom anna må alle deltakarane kantra med kajakken, fortel Flotve.
Etter kurset vanka det kursbevis. Mange stader som leiger ut kajakkar, krev slike.
Ifølgje Flotve det lett å læra å bruka ein kajakk.
– Av alle vassaktivitetane eg har drive med, er kajakk det som krev minst. Det fine med kajakk er at det er kjekt frå første augneblink. Det å bruka seglbrett er til dømes mykje vanskelegare. Det gjer at mange fort mistar motet, seier han.
Har kjøpt utstyr
Sjøaktiv Strandebarm tok initiativet til kurset. Sjøaktiv Strandebarm er ei gruppe som er organisert under Strandebarm idrettslag, fortel gruppemedlem Siv Øygard. Ho fortel at gruppa har kjøpt inn åtte kajakkar og to kanoar som medlemene av idrettslaget kan låna og andre interesserte kan leiga.
Då Sjøaktiv Strandebarm høyrde om Flotve og hans kajakkurs, bestemde dei seg for å freista få han til Strandebarm.
Det vart arrangert tre kurs – eitt på torsdag, eitt på fredag og eitt på laurdag. Til saman deltok 29 personar. Dei fleste bur i Strandebarm, men det var òg personar frå andre deler av heradet.
Øygard fortel at gruppa vurderer å kjøpa inn både seglbrett og trøbåtar.
Vert ferdige i vinter
Asbjørn Sangolt er ein av initiativtakarane til sjøaktivitetssenteret. Han fortel at senteret ikkje er langt frå å vera ferdig.
– Det står nokre småting att. Dessutan er me ikkje ferdige med kjøkenet. Senteret er eit dugnadsprosjekt. Det fine med dugnadsprosjekt er at sluttpunktet kan vera litt flytande. Målet er at det skal vera ferdig til jul, fortel han.
Planen var eigentleg å få senteret klart til sommaren. Den planen sette koronaviruset ein stoppar for.
– Viruset gjorde at færre kunne halda på samstundes. Det vart ein brems for oss, seier Sangolt.
Han fortel at til no har 50 personar utført dugnadsarbeid på senteret. Dugnadsgjengen har passert 6.000 dugnadstimar.
