Tok opp praksis for bilbruk

Vel å merka vert det gjort unntak ut frå sunn fornuft. Ein kan såleis avtala med næraste leiar at ein tek med seg arbeidsbilen heim dersom ein uansett skal arbeida i nærområdet dagen etter, for å sleppa å reisa til Norheimsund.

Det opplyste rådmannen då Gry M. Kyrkjeeide (Frp) stilte spørsmål om praksisen for frammøtestad i arbeidsmøtet om budsjettet i formannskapet 20. november.

– Ikkje fast praksis

Rådmannen opplyste at ho er kjend med at det er gjort unntak, på førespurnad frå tilsette.

– Men det er ikkje ein innarbeidd rutine? spurde Kyrkjeeide.

– Det spørst kor mykje du skal ha skriftleg av slike ting. Som sagt bør det vera ein fornuftig arbeidsdag og at me kan løysa arbeidsoppgåvene, sa rådmannen.

HF har fått innsyn i dei interne retningslinene for bruk av kommunale bilar. Dei seier at det nemnde unntaket gjeld tilsette som bur «i ytterdel av kommunen» og avsluttar arbeidsdagen i den delen av kommunen dei bur i.

«Dette er eit unntak av praktiske grunnar, og skal ikkje innarbeidast som fast praksis», heiter det.

Somme får køyra

Føringane fortel elles fylgjande:

• Overordna vakthavande i Kvam brann og redning kan av beredskapsomsyn nytta bilar etter arbeidstid.

• Vakthavande innan vatn og avløp, bygg og veg vinterstid kan ta med bil heim.

• Driftsleiar for veg kan ha bil med heim, men som hovudregel ikkje nytta han på fritida bortsett frå når vêrvarselet tilseier trong for snøgg utrykking.

• Ansvarleg for tekniske anlegg og bygg kan av beredskapsomsyn ta med bilen heim, men ikkje nytta han på fritida. Det gjeld «inntil vidare» sidan praksisen «vert vurdert i grenseland»:

• Byggdriftar med fast arbeidsstad i Strandebarm kan parkera ved kommunalt bygg i Strandebarm, og reinhaldsleiaren kan parkera ved Tørvikbygd skule.

Budsjettet og økonomiplanen vert handsama av heradsstyret torsdag 12. desember.