Tok initiativ til stupebrett
Tuva Gauteplass Skår og Tora Neteland Tørvik saknar eit stupebrett og ein stige i Holmsund. Kva skal til for at dei kan få det?
Spørsmålet vart sendt til Kvam herad 3. juni. Jentene skriv i e-posten at det er kjekt å hoppa frå berget, og at det er moro å samlast med vener i området. Likevel er det noko som manglar.
Når ein skal hoppa i sjøen, lyt ein alltid dobbeltsjekka om det er djupt nok, og gjerne ta ekstra sats for ikkje å treffa botnen og skada seg, skriv jentene. Det skulle òg ha vore ein stige i nærleiken, som gjorde det enklare å koma seg opp. No er det berre eit tynt tau som er knytt saman, og det er veldig glatt, står det i brevet.
14 dagar seinare vart jentene inviterte på synfaring saman med Kvam herad og Bergen og Omland Friluftsråd (BOF). Jentene deltok ikkje, men synfaringa fann likevel stad, opplyser Jon Nedkvitne, leiar for eining for samfunn, kultur og næring i Kvam.
Saman med BFO vart det gjort målingar på ulike stader i Holmsund, og diverre er det for grunt til at heradet kan tilrå å setja opp eit stupebrett, fortel Nedkvitne.
– Så me har teke dei på alvor, men me lyt fylgja retningslinene til BOF, seier han.
