– To verksemder står bak 77 prosent av utsleppa

Det går fram av ein rapport om potensialet for klimagassutslepp i Hardanger som Ernst & Young har laga på vegner av Hardangerrådet. Konklusjonane vart presenterte på Hardangerkonferansen i Ulvik torsdag. Rapporten er ikkje levert enno.

Ifylgje konsulentselskapet er utsleppa i Hardanger både høge og veksande. Målestokken som er nytta, er karbondioksidekvivalentar per innbyggjar. Samla vert 572 tusen tonn ekvivalentar sleppte ut i regionen. Gjennomsnittet i Noreg er 9,1 tonn per person, medan talet i Hardanger er 26,7, hevdar konsulentane.

Nokre meir enn andre

Utsleppa varierer mildt sagt mellom kommunane. Medan ulvikjene slepper ut 4 tonn per person, slepper ullensvangarane og kvemmingane ut høvesvis 31,4 og 24,6 tonn per hovud. Hovudårsaka er dei to nemnde verksemdene. Eidfjørene slepper ut 16,5 tonn per person.

Trøysta er at utsleppa legg til rette for høg verdiskaping, nærare bestemt 7,2 milliardar kroner eller 722.000 kroner per harding i året.

Bak industrien kjem vegtrafikk, landbruk og sjøfart som dei største utsleppskjeldene. Kring 11 prosent av utsleppa kjem frå trafikken, og 66 prosent av desse utsleppa står tunge køyretøy for.

Ernst & Young gjev råd til tiltak i rapporten, men detaljane er førebels ikkje kjende. Råda som vart presenterte i Ulvik, var å kutta smart, å samarbeida og konkurrera og å vera stolt og raus.

Mål utan sviande tiltak

Korleis kan Hardanger verta grønare og dra nytte av det grøne skiftet? Det var det store temaet på årets konferanse, med nøkkelorda klima, natur og berekraft. Ordførarane avrunda han med å drøfta kor langt dei har kome med å redusera klimautslepp.

Kvam herad har teke mål av seg til å redusera utsleppa med 55 prosent innan 2030. Ordførar Torgeir Næss (Ap) trekte fram lokale tiltak som stønad til enøktiltak, men vedgjekk at kommunane så langt er flinkare til å setja seg mål enn til å innføra tiltak som merkast.

– Det kommunane saknar, er klare statlege føringar, så slepp kvar kommune å finna opp krutet, sa han.

Roald Aga Haug (Ap) trekte fram mellom anna vedtak om innføring av nullutsleppskøyretøy og modernisering av renovasjonsanlegget. I tillegg påpeika han at politisk lobbyisme som fører til nye samferdsleprosjekt, kan redusera utslepp. Han opplyste, under tvil, at kommunen ikkje har sett seg eit konkret mål om reduksjonen av utslepp.