Jon Askeland (Sp, t.h.) held fram som fylkesordførar. Sigrid Brattabø Handegard (Sp) fekk brått plass i fylkesutvalet, som Askeland leier. Her er dei to på jondalsferja i 2022.

To lokale heltar i fylkesutval

Bjarte Helland (INP) frå Kvam og Sigrid Brattabø Handegard (Sp) frå Jondal vert del av fylkesutvalet dei komande fire åra.

Ragnhild Økland Børven
Sigbjørn Linga
Bladstyrar
Publisert Sist oppdatert

Det vedtok fylkestinget i det konstituerande møtet 17. oktober. Handegard får plassen til partifelle Alexander Øren Heen (Sp), som har fått fritak for å sitja på Stortinget etter at partifelle Erling Sande vart statsråd.

Helland vart dessutan vald inn i valnemnda. Der får han selskap av Handegard, som elles er gruppeleiar i Sp og medlem i hovudutval for næring.

Bjarte Helland (INP) frå Kvam har på kort tid erobra plass i både heradsstyret, fylkestinget og fylkesutvalet.

Jon Askeland (Sp) held fram som fylkesordførar, og Stian Jean Opedal Davis (Ap) ny fylkesvaraordførar. Bak dei står fleirtalskoalisjonen Sp, Ap, SV, KrF, V og MDG.

– Takk for tilliten. Eg skal gjere mitt beste og inviterer til samarbeid i heile fylkestinget dei neste fire åra, seier Askeland til vlfk.no.

Desse representerer Ullensvang i det nye fylkestinget. Frå venstre: Nina Haug (Ap), Emil Tomasgard (Ap), Sigrid Brattabø Handegard (Ap), Gunnar Moland (H) og Ida Lutro (H). Dei har plass i fire ulike utval.

Arve Helle (Ap) overtek roret i hovudutval for samferdsle og mobilitet. Åsmund Berthelsen (SV) leier hovudutval for opplæring og kompetanse. Jacob Nødseth (V) styrer hovudutval for kultur, idrett og integrering, og Oddmund Klakegg (Sp) er leiar i hovudutval for næring.

Fylkestinget på 65 rommar 36 nye representantar og to nye parti, opplyser fylkeskommunen i ei pressemelding.

I ein tidlegare versjon av denne saka stod det at Hermod Mundheim (INP) vart tredje vara i kontrollutvalet. Det stemmer ikkje. Feilen vart retta 18. oktober klokka 08.20.

politiske parti vestland fylkeskommune val politikk nyhende
Laga med Labrador CMS