To kvinner på topp
Likningstala er på plass, og HF har snoka for deg. Kven i heradsstyret hadde størst inntekt i fjor, og kor mykje sit dei på elles?
Arne Sandven (H) hadde 1,7 millionar kroner i alminneleg inntekt – altså etter frådrag – i fjor. Det plasserer han på både inntekts- og skattetoppen i Kvam heradsstyre. Inntekta er meir enn 1 million kroner over gjennomsnittsinntekta til medlemene.
Den best betalte kvinna lyt ein ned på 10.-plass for å finna. Der ligg Anne Marie Øvrevik (V) med ei inntekt på 676.748 kroner.
Om inntektstoppen er mannsdominert, kan ikkje det same seiast om formuestoppen. Der står nemleg to kvinner på topp. Arnhild Litleré (Ap) står øvst med om lag 4,8 millionar kroner i formue. Under henne kjem Karina Hoff (H) med 3,7 millionar kroner.
I Ullensvang lyt ein ned på 5.-plass for å finna ei kvinne på lista. Der finn me Randi Elisabeth Oppedal (Sp) med 1,7 millionar kroner.
Varaordførar Inger Synnøve Vestrheim (H) ligg øvst på inntektstoppen blant kvinnene, med 1,7 millionar kroner.
Øvst på to lister
Berre 18.400 kroner skil gjennomsnittsinntekta til heradsstyremedlemene i Kvam og Ullensvang. Best betala er dei i sistnemnde kommune. Gjennomsnittsinntekta er 613.412 kroner for medlemene i Kvam, og 631.812 kroner for medlemene i Ullensvang.
Medianløna i heradsstyret i Kvam er 546.740 kroner. I kommunestyret i Ullensvang er ho 526.962 kroner.
I Ullensvang kommune er Harald Sandvik (Sp) den i kommunestyret som er oppført med høgast inntekt. Han hadde ei inntekt på 2,2 millionar kroner. Øvst er han også på lista over dei med mest i formue i kommunestyret. Sandvik har ein formue på 3,8 millionar kroner.
Restskatt
I år var det ifylgje Skatteetaten uvanleg mange som fekk ein stor sum att på skatten. I Kvam var 6.725 personar skattepliktige i 2022. 5.111 av dei fekk pengar til gode, i gjennomsnitt 12.645 kroner.
Talet på dei som fekk restskatt, er 1.113 personar. I gjennomsnitt måtte dei betala 23.570 kroner til staten.
I Ullensvang var 9.344 personar skattepliktige. Av dei fekk 7.194 pengar til gode, i gjennomsnitt 11.766 kroner. Talet på dei som måtte betala restskatt er 1.449 personar. Dei måtte i gjennomsnitt ut med 23.865 kroner til statskassa.
HF gjer merksam på at skattelistene ikkje alltid speglar den reelle inntekts- og formuessituasjonen, mellom anna av di tala viser netto inntekt og netto formue. Red.
