Sigbjørn Linga. Gruppeleiar Olav-Magnus Hammer (Ap) er i Odda, men ikkje som formell representant for styringsgruppa i Jondal. Til venstre sit Odda-ordførar Roald Aga Haug (Ap).
To jondølingar på uoffisiell Odda-visitt
Berre Ap og H er representerte av jondalspartia i styringsgruppemøtet i Odda i dag. Men dei representerer eigentleg ikkje Jondal kommune i møtet.
Styringsgruppene som arbeider med kommunereforma i Ullensvang og Odda er samla på Meieriet i Odda i dag. Ingen frå det største partiet i Jondal, Sp, deltek – heller ikkje ordføraren. Han meiner vedtaket i Jondal om å seia nei til samanslåing med nabokommunane gjer at det ikkje er nokon grunn for Jondal til å delta. Han er likevel open for vidare samarbeid med grannekommunane. Gruppeleiarane Olav-Magnus Hammer (Ap) og Tørres Mæland (H) er på plass inst i Sørfjorden, men ikkje som formelle jondalsrepresentantar. Ingen tok til motmæle då oddaordførar Roald Aga Haug (Ap) lufta om det var greitt for styringsgruppene at jondalsduoen deltok. Haug sa at dei to har ei litt anna rolle enn dei andre i møtelyden, men at dei vil få høve til å delta i arbeidet og få ordet på lik line med resten.
Fylkesmannen talar
Møtelyden delte seg i før matpausen i grupper for å drøfta ulike sider av kommunesamanslåinga. Hammer og Mæland deltok ivrig i debattane. Fylkesmann Lara Sponheim er komen til Meieriet, og skal etter matpausen og oppsummeringa av gruppearbeidet få ordet for å orientera om den vidare prosessen i reformsaka.
Artikkelen held fram under annonsen.
Tørres Mæland (H) og Olav-Magnus Hammer (Ap) frå Jondal fekk delta i kvar si arbeidsgruppe. I den tredje vart det ingen jondølingar.
