To grasbrannar på same staden
Ein gras- og lyngbrann oppstod på Mundheim tysdag føremiddag. Då slangane var pakka saman, dukka det opp ein brann til like ved.
Det opplyser varabrannsjef og innsatsleiar Svein Valland Laupsa.
Den fyrste meldinga kom litt over klokka 09 tysdag morgon. Vest politidistrikt opplyste på Twitter at det brann i eit område på kring tjue rutemeter ved Mundheim eller Omastrand, og at politiet og brann- og redningstenesta var på veg. Det viste seg at brannen var lokalisert på Mundheim, på motsett side av fylkesvegen som Grannehallen.
Det var bebuarar i området som oppdaga brannen, fortel Laupsa. I 10-tida opplyste vaktkommandør Lars Petter Lorvik ved 110-sentralen at brannen var under kontroll, men at det var ein del røyk i området.
Ifylgje Laupsa var brannområdet på om lag hundre rutemeter. Då brannmannskapet kom fram – eit brannlag frå Oma stasjon og ein tankbil frå Norheimsund – hadde dei som melde om brannen allereie gjort eit godt arbeid med å førebyggja spreiing, fortel Laupsa.
– Dei fortener skryt, seier varabrannsjefen.
Brannkonstablane fekk kjapt kontroll på brannen, og fekk kjølt ned området.
Då oppryddinga nærma seg ferdig, og slangane var rulla inn, kom det endå ei melding om brann. Denne gongen berre 100 meter frå den fyrste hendinga. Det var nokre skogsarbeidarar på motsett side av dalen som oppdaga det. Sidan brannmannskap og utstyr var like ved, gjekk både utrykkinga og sløkkinga kjapt.
– Det var bålbrenning begge stadene. Dei som brende bål, trudde dei hadde sløkt det, men det hadde teke seg opp att, seier Laupsa.
Han oppmodar folk om å vera varsame og hugsa på bålforbodet. Ein skal ikkje brenna bål i utmark utan at det openbert ikkje kan medføra brann, påpeikar han.
Politiet avhøyrde vitne på staden.
