To er tiltala for grovt underslag
To tidlegare kommunalt tilsette er tiltala for grovt underslag og må møta i Hordaland tingrett.
Ifylgje tiltaleavgjerdene har båe hatt rett til å disponera bankkorta til brukarar av kommunale tenester. Dei skal ha nytta korta til eiga vinning ved å underslå ein samla sum på 104.915 kroner. Dette skal ha føregått over eit tidsrom på eit par år.
Dei tiltala må møta i retten i to ulike saker i mai og juni.
HF har vore i kontakt med advokatane som er oppnemnde i dei to sakene. Forsvararane hadde torsdag ikkje vore i kontakt med klientane. Dei kunne difor ikkje gjera greie for korleis desse stiller seg til tiltaleavgjerdene.
Politifullmektig André Jakobsen seier til Bergens Tidende at den eine tilsette erkjenner delvis straffskuld. Det er ikkje kjent korleis den andre stiller seg til spørsmålet.
HR-leiaren i den aktuelle kommunen seier til HF at dei to sakene i utgangspunktet er personalsaker, og at kommunen difor ikkje ynskjer å kommentera dei. Leiaren påpeikar at ulike ordningar har vore vurderte av kommunen for å redusera risikoen for økonomisk misbruk, men at det er vanskeleg å laga vasstette system og at ein til ein viss grad må basera seg på tillit.
HR-leiaren seier at kommunen avdekte det mistenkte underslaget, granska det som hadde skjedd og melde sakene til politiet.
HF er kjend med at dei tilsette ikkje arbeider for kommunen lenger.
