– To avvik på campingplass
Kvernavollen Camping AS vart pålagd av Kvam brann og redning å retta opp i to avvik etter eit tilsyn ved campinga i juni.
Tilsynet var eit såkalla samordna tilsyn med representantar frå både brannvesenet, plan- og byggjesaksavdelinga i Kvam herad og Det Lokale Eltilsyn (DLE). I ein rapport frå tilsynet skriv Kvam brann og redning at det såg ut til at både campingeigar Nils Bjarte Rosseland og ein brukarrepresentant som var til stades, har fokus på branntryggleik for alle som oppheld seg på campingplassen.
Ein stikkprøve vart gjennomført i ei campingvogn. Vogna hadde brannteppe, sløkkjeapparat, gassalarm og røykvarslar. Vidare vart det under synfaringa kontrollert at plasseringa av sløkkjeutstyr stemte med orienteringsplan.
To avvik vart rapporterte frå Kvam brann og redning: Det kunne ikkje dokumenterast at ein brannslange i eit sørvisbygg vart sjekka med kontrollar, og det mangla dokumentasjon for risikovurderingar. Under tilsynet kom det fram at eigaren har tenkt gjennom ulike situasjonar, men desse vurderingane kunne ikkje dokumenterast.
27. september sende Rosseland risikoanalyse, branninstruks og ein vedlikehaldsoversikt over brannvernutstyr til Kvam herad.
