To av tre i Jondal kan få avslag
Bjarne Guntveit kan få 130.000 kroner frå næringsfondet til produksjons- og sagbruksutstyr i verksemda Jondal Sag.
Slik lyder i alle fall rådmannens ord, før utval for samfunn, plan og næring avgjer saka onsdag 27. november. Summen er i samsvar med søknaden.
Guntveit tilbyr både leigeskjering av tømmer og materialar av eigenskore tømmer, med base på ei tomt langs vegen mellom Jondal og Byrkjeland. Her er det sett opp hallar på i alt 600 rutemeter for lagring av materialar og sagbruket. Etterspurnaden er aukande.
Planen er å setja i stand den nye saga og byggja opp eit permanent og ergonomisk sagbruk. Samla budsjett er 520.000 kroner.
Rådmannen meiner det er viktig å kunna foredla tømmer, og meiner sagbruket byggjer opp under målet i kommuneplanen om eit unikt og allsidig næringsliv.
To andre av dei 12 søknadene er frå Jondal.
• Rådmannen føreslår å avslå søknaden frå See the Fjords AS om stønad til å byggja ei utleigehytte for turistar, eit prosjekt som er kostnadsrekna til over 3,7 millionar kroner. Søknaden lyder på 0,3 millionar. Rådmannen meiner søkjaren har økonomi til å lånefinansiera satsinga, og påpeikar at søkjaren fekk stønad til prosjektet i fjor haust. Det er ikkje gjennomført. Fristen for å gjennomføra det går ut denne månaden.
• Rådmannen føreslår å avslå ein søknad frå Tre Tradisjon Herand om stønad til opplæring i orgelbyggjarfaget. Han viser til at innehavar Arjen L.H. Stolk har søkt om stønad til driftskostnader som løn, noko som ikkje vil vera i samsvar med føringane for bruk av næringsfondet.
Samla vart det søkt om stønad på nær 2,1 millionar kroner i haust. Ramma er ein knapp million kroner. Rådmannen føreslår å dela ut 920.000. Den største summen – 350.000 kroner – vil han gje til eit husværebygg ved Kinsarvik Camping.
