To 90-årsjubileum på to dagar
I år er det 90 år sidan Herand Grannahus og ungdomshuset Jonsvoll i Jondal vart førte opp av ivrige dugnadshender. Slikt lyt feirast.
Jonsvoll vart innvigt til bruk i desember 1933. Då bygget feira 50 år i 1983, var det fyrste bordsetet ikkje slutt før etter midnatt, stod det i HF nokre dagar seinare. Anne Karin Stormyr, leiar i Jondal Ungdomslag, seier at feiringa denne gongen var litt meir effektiv.
Jubilanten vart feira med viltgryte og jubileumskake og program undervegs fredag kveld.
Ei dame Stormyr delte bord med under middagen, fortalde at ho hadde bryllaup i huset på 1960-talet. Då var det bokstaveleg tala andre tider. Vedfyring måtte til for å få steikjeplatene varme, og kjølerom fanst ikkje. Ikkje eingong i kjellaren ville geleen stivna.
Ei anna dame fortalde om når det skulle skipast til skodespel eller anna i storsalen. Då fòr ungdomane over til Vangdalsberget, for der var det så mykje barlind. Barlinden tvinna ungdomane saman til lange lauvrekkjer, som dei pynta lokalet med.
Ein mann Stormyr kom i prat med, som var aktiv skyttar, minnest at han var på miniatyrskyting i kjellaren på huset.
Andre tider
Sidan har mykje vorte gjort, og i dag er huset utstyrt med det meste ein treng for å arrangera større selskap, ifylgje Stormyr. Ho har vore leiar i ungdomslaget sidan 2011 og har fått med seg mange av oppgraderingane. For berre nokre veker sidan kom det nye stolar til festsalen. No står drenering på oppsida av huset og oppussing av eit vaskerom på lista over gjeremål.
Det er eit veldig brukande hus, meiner Stormyr. Ein har festsal med stor scene, matsal med godt kjøken og heis mellom etasjane. Når vaskeromsavdelinga òg er på plass, trur Stormyr det vert veldig bra.
– Elles håpar me at både unge og eldre krefter finn ut at dei har lyst til å bruka scena og huset meir, seier ho.
Spesielt ungdomane ynskjer ho med – ho vil at det skal vera «deira» hus. Nokre ungdomar har teke «veslesalen» litt i bruk. Det synest leiaren er kjekt.
Ein fest for alt
Herand Grannahus feira jubileet laurdag kveld. På planen stod mellom anna ein prolog, sketsjar, dans og betasuppe. Dessutan fortalde Einar Jakob Ystevik litt om livet i forsamlingshuset då han var yngre.
Til HF seier Ystevik mellom anna at Herand på den tida var ei isolert bygd. Bilane var få, og ungdomshuset hadde ikkje mykje å konkurrera med. Det var ikkje så mange alternativ, og korkje fjernsyn eller mobiltelefonar tok opp tid den gongen.
Det var fleire lag ein kunne vera med i, og aktiviteten i huset var stor. Annankvar sundag var det møte i ungdomslaget, minnest han. Dei sundagane ungdomslaget ikkje hadde møte, møttest avhaldslosjen «Samlen» i bygget. Elles var det, som i dei fleste ungdomshus, mange festar gjennom året, ifylgje Ystevik. Morsdagsfest, 17. mai-fest, jonsokfest, sommarfest, haustfest og julefest, for å nemna noko.
