Tingretten: Delte meiningar i regionen

Sistnemnde opplyser NRK Vestland. Ifylgje statskanalen er han utolmodig og vil ha fortgang i prosessen med å gjera om domstolsreforma og vekkja Hardanger tingrett på Lofthus til live som sjølvstendig rettsstad.

Det synspunktet kjem fram også i eit skriv frå Hardangerrådet til Justis- og beredskapsdepartementet, vedteke i rådsmøtet 16. desember.

– På bakgrunn av dei klare lovnader som vart gjevne kort tid før valet i 2021 og i regjeringsplattforma, hadde ein forventa handling i denne saka før årsskiftet 2021–2022. No er eitt år gått utan at dette er gjennomført. Me ber om at saka vert gjeven høgaste prioritet, skriv regionrådet.

Sjefen vil ikkje snu

Over fire hundre svar kom då «reverseringa» var på høyring i vår. Nokre få av dei gjeld tingretten i Hardanger. Ingen kom frå Kvam.

Sorenskrivar Håkon Rastum i Hordaland tingrett meiner at det at det beste er å halda på strukturen slik han er i dag. Ifylgje han gjev dagens struktur med Hordaland tingrett samla sett ein betre og meir effektiv bruk av offentlege midlar enn som to separate domstolar.

Rastum understrekar at det er viktig å få ro kring domstolsstrukturen utan risiko for nye endringar av han i åra framover.

– Det er lite produktivt for domstolane å halda fram ein langvarig strukturdebatt, hevdar han.

Sjefen er på kollisjonskurs med eigne tilsette i Hardanger. I eit innspel skriv dei, vel å merka utan å oppgje namn, at tida er inne for å uttala seg etter at dei tidlegare har fylgt opp politiske vedtak lojalt.

– Felles leiing er aldri eit godt alternativ. Ein domstol har bruk for ein leiar som er til stades og ikkje ein som berre er innom så vidt eit par gonger i året. Det er lett å sjå at ei underavdeling kan verta nedprioritert, underfinansiert og til slutt forsvinna heilt, skriv dei tilsette.

Dei meiner avstanden er for stor både til Bergen og Haugesund, og meiner at domstolane skal vera tilgjengelege for innbyggjarane.

Politiet vil snu

Hardanger politistasjonsdistrikt meiner at det er flest argument for å setja girspaken i revers. Nokre av argumenta er at ein lokalt forankra tingrett styrkjer kjensla av rettstryggleik til befolkninga, forenklar kommunikasjonen mellom involverte aktørar i rettsprosessane, og legg betre til rette for føreseielege vilkår for lokalt politi i samhandling med domstolen.

– Me meiner at det var meir føreseieleg og at samhandlinga fungerte betre før domstolsreforma, understrekar politiet.

Også Ulvik herad og Ullensvang kommune ynskjer tingrett på Lofthus. Ordførar Haug skriv på vegner av kommunen, i eit utspel som ikkje vart politisk handsama, at den nye organiseringa opnar for gradvis nedbygging av distrikta og tap av kompetansearbeidsplassar. Haug understrekar mellom anna trongen for lokal rettleiing, for kort reiseveg til ein rettssal med domarar som kjenner lokale tilhøve, og for oppdrag til lokale advokatar. Han er i tvil om innsparingseffekten av samanslåinga.

– Er det kanskje heller slik at Hardanger tingrett vil ha smådriftsføremoner? For store organisasjonar kan skapa unødvendig byråkrati, med mange mellomleiarar og mange interne rundar før det vert teke ei avgjerd, noko som går ut over tida til å gjere faktisk domstolsarbeid, skriv Haug, som også ottast rekrutteringsvanskar om ikkje Hardanger er ein eigen tingrett.

– Når leiinga sit i sentralt, vil det lett oppstå eit «sug» mot Bergen. Det er naturleg at leiinga helst ynskjer alle medarbeidarar under same tak, skriv han.

Han tek til orde for å overføra til dømes Voss og Samnanger frå Bergen til Hardanger tingrett, både for å avlasta bergensarane og styrkja hardingane.

Voss mot Hardanger

Voss herad meiner på si side at den nye strukturen fungerer godt.

– Med gode kommunikasjonar mot Bergen og med høve til å setja rett på Voss finn me at dagens struktur ikkje bør endrast, skriv heradet i eit innspel vedteke av formannskapet.

Voss er vertskap for delar av jordskifteretten, som er lokalisert både i Bergen og på Voss. Heradet understrekar at ordninga har fungert godt og at det er råd å finna kombinerte ordningar som både tek omsyn til ynske om effektivisering og ein desentralisert struktur.

– Det er ikkje eit spørsmål om anten desentralisering eller sentralisering. Det er råd å få til begge delar, skriv Voss herad.

Kvam herad sende ikkje fråsegn, men stilte seg bak fråsegna Hardangerrådet sende. Rådet krev gjenoppretting av ein lokal tingrett.