Tilsyn avdekte fleire brot
Kvam herad er ikkje nøgd med stoda på Kvamskogen Camping.
12. april kom ein tilsynsrapport frå plan- og byggjesakseininga etter eit tilsyn i juni i fjor. Tilsynet avdekte mellom anna mange små og store avvik på vognplassering, tre avvik på vogntypar og to avvik på veg.
Campingvogner er plasserte delvis i friluftsområde og delvis i omsynssona for ein høgspentleidning, for å nemna noko. Fleire tiltak er vurderte som søknadspliktige, skriv Bjørn Vik, fagleiar for byggjesak og geodata, i rapporten.
Solveig Steine driv campingen, medan mannen hennar, Håkon B. Steine, eig han. Campingplasseigaren hadde høve til å koma med merknader til rapporten innan 10. mai, men gjorde ikkje det. Solveig Steine opplyser at paret sit på gjerdet og ventar på at heradet skal kontrollera dei andre campingplassane på Kvamskogen.
For stort og for nærme
Då campingplassen vart etablert, var kravet til avstand mellom campingeiningar tre meter. Også der var det avvik å finna. Vik skriv at stikkprøvar vart tekne av avstanden mellom bygningsdelar på campingvognplassane og breidda på «branngatene» mellom vognene.
– Stikkprøvane avdekkjer mange brot, skriv fagleiaren.
«Mange avvik» var det også når det gjeld storleik på spikartelt, kjem det fram i rapporten. Dei fleste spikartelta er ifylgje ein kartanalyse over 12 rutemeter, som var maksimalgrensa i dei tidlegare, lokale campingvognforskriftene.
– Vil ha det trygt
Med bakgrunn i tilsynsrapporten har rådmannen funne det naudsynt å førebu varsel om pålegg. Steine må så snart som mogleg setja i verk naudsynt arbeid for å redusera faren for brannsmitte på heile campingplassen. Eigaren bør byrja med å kartleggja alle avvika frå gjeldande avstandskrav, og laga ein tiltaksplan for å retta dei, meiner heradet. Om planen avvik frå gjeldande avstandskrav, må alternative løysingar prosjekterast og utførast.
Fristen for å gjennomføra naudsynte tiltak er 9. mai 2025. Før den tid må eigaren kartleggja spikartelt, terrassar, buer og parkeringsplassar for bil, og laga ein tiltaksplan for å retta registrerte avvik.
Kvam herad utførte tilsynet saman med Kvam brann og redning og el-tilsynet. HF har omtala deira funn etter tilsynet før.
– Me vil helst ha det så trygt som mogleg, sa Steine den gongen.
Les også:
