Tilstod grovt underslag

Underslaga er samla på om lag 1,1 millionar kroner, og er utførte over lengre tid, ifylgje domen. Retten meiner at mannen har handla forsettleg, med mål om å oppnå personleg vinning.

Spela dei bort

Vinteren 2018 vart over éin million kroner frå selskapet overførte til ein privat konto. Pengane gjekk til nettgambling, forklara mannen i retten. I april same året selde mannen ein bil tilhøyrande selskapet, og stakk restbeløpet etter salskostnader og hefte i eiga lomme. Tiltalte ordna det også slik at sluttoppgjeret frå tre ulike jobbar vart overførte til ein privat konto. Pengane vart ikkje førte vidare til selskapet.

Selskapet til mannen vart slått konkurs i mai 2018, etter litt over to års drift. Forholda vart melde til politiet i juli same året. Etter konkursen forsvann ein konteinar med utstyr for rundt 70.000 kroner frå konkursbuet.

Mannen forklara i retten at han flytta konteinaren og seinare selde han for 60.000 kroner. Ein bil som tilhøyrde selskapet, vart ikkje gjord greie for med det same. Bedriftseigaren har forklara at bilen var disponert av ein tilsett, og at han ikkje hadde oversikt over kvar bilen var då konkursen vart opna. Han meiner sjølv at han ikkje heldt bilen skjult, og retten frifann mannen på dette punktet.

Fekk rabatt for tidsbruk

Forholda i tiltalen ligg rundt tre år tilbake i tid. Saka låg i ro hjå politiet i eitt år. Det utgjer ei krenking av mannen sin rett til rettssak, og han vart kompensert for dette med ein strafferabatt på fire månader.

Etterforskinga var ferdig i mars 2020, og tiltalen vart teken ut i mai 2020. Hovudforhandlinga, som skulle ha funne stad i oktober 2020, vart utsett på grunn av forsvararbyte, karantene og sjukdom.

Mannen er domfelt to gongar før, for mellom anna køyring i ruspåverka tilstand og bedrageri. Han har forklart at rusproblema låg bak dei straffbare forholda, som igjen førte til nettgambling. Den dømde mannen har no vore rusfri i to år og har fått seg fast jobb. Tingretten meiner at soning av fengselsstraff kan føra at mannen vil falla ut av yrkeslivet att og risikera nye rusproblem.

Straffa vart difor 270 timars samfunnsstraff. Mannen er dessutan dømd til å betala ei erstatning på 1.328.260 kroner til konkursbuet.