Tilstod dei faktiske forholda, men nekta straffskuld
Ein mann er dømd til fengsel i 16 månader for å ha vore valdeleg mot og truga sambuaren.
I tillegg vert mannen nekta å kontakta eller oppsøkja kvinna og vera i heimen hennar i eitt år frå domen er rettskraftig. Det er han ikkje enno.
Hordaland tingrett meiner det er prova at mannen i om lag to år har utsett sambuaren for fysisk og psykisk mishandling gjennom vald, trugsmål, krenkingar og nedsetjande åtferd. Han har slege henne i hovudet og overkroppen, lugga, klope og teke kvelartek på henne, og ved eitt høve truga med slå henne i hel. I tillegg knuste han gjenstandar i heimen, slo i bord og vegger, avgrensa fridomen hennar, nekta henne å sova og kasta henne ved fleire høve ut av huset, ifylgje domen. Valden har gradvis auka i omfang.
Ein kveld i juni i år fekk kvinna nok, etter å ha vorte slegen ei rekkje gonger, og ringde til politiet. Mannen vart då fengsla.
Mannen sa seg ikkje skuldig etter tiltalevedtaket. Mannen festa likevel lit til forklaringa til kvinna om at ho var utsett for vald, men forklara i retten at han hugsa lite frå dei ulike episodane. Han forklara heller ikkje kvifor han ikkje erkjende straffskuld, men sa at helsa hans og at han kjende seg åleine, nedprioritert og oversett var årsaka til handlingane.
Forklaringar frå kvinna og ei rekkje vitne overtydde retten om at han måtte dømast. Kvinna hadde notert ei rekkje hendingar for å freista avdekkja kva som utløyste dei. Ho meinte at alle tilfella hende då mannen var påverka av alkohol, og at han elles var snill, roleg og sakleg. Mannen har dei siste åra drukke alkohol dagleg, ifylgje han sjølv for å slappa av.
I retten vart det spela av videoopptak som dokumenterte krangling og slag, og som ifylgje retten synte ein aggressiv, pågåande og tidsvis provoserande mann. Han tok gjerne opp irritasjonsmoment som hadde bygt seg opp. Særleg retten til bustaden deira har vore sentral i kranglane.
Aktor la ned påstand om fengsel i 18 månader og kontaktforbod i eitt år. Forsvararen la ned påstand om frifinning. Retten gav eit visst frådrag i straffa fordi mannen vedgjekk dei faktiske forholda og har planar om å gjera noko med alkoholproblema. Mannen bad i retten om orsaking til kvinna og familien for det han har påført dei.
Kvinna ynskte ikkje kontaktforbodet, fordi ho ynskte å ha høve til å hjelpa mannen. Retten meiner forbodet er naudsynt for å redusera risikoen for nye straffbare handlingar. Kvinna har fleire gonger trekt meldingar til politiet og skjult for andre kva som har gått føre seg i heimen.
