– Tilstod å ha stole medisin

Det kjem fram i ein dom frå Hordaland tingrett.

Kvinna var tiltala for grovt tjuveri, subsidiært grovt underslag, og for å ha oppbevart narkotika i heimen. Mellom juli i fjor og januar i år stal ho minst 150 tablettar frå medisinrommet som ho hadde tilgang til på arbeidsplassen. Tablettane var såkalla B-preparat. B-preparat er sterkt vanedannande medisin, som påverkar sentralnervesystemet og kan gje ein uheldig ruseffekt, ifylgje Den norske legeforening.

Tablettane vart oppbevarte i heimen.

– Ikkje grovt

Då kvinna møtte i retten i midten av august, tilstod ho utan atterhald. Opplysningar frå arbeidsplassen, som syner at ho var på arbeid då medisinen forsvann, styrkjer tilståinga, står det i domen.

Retten drøfta om gjerninga høyrde til tjuveri eller underslag, og enda på sistnemnde. Retten byggjer det på at kvinna hadde lovleg tilgang til medisinrommet. Gjennom stillinga hadde ho dessutan tilgang til å henta medisin ut av medisinrommet, fordela medisinen i dosett og dela ut til pasientar.

Underslaget er ikkje grovt, men «alminneleg», meiner retten. Det grunngjev retten med at ikkje berre kvinna, men fleire på arbeidsplassen hadde tilgang til medisinrommet. Dessutan er pengeverdien av tablettane minimal, og tablettane vart ikkje distribuerte til andre.

Påførte ubehag

Kvinna vart dømd til 45 timars samfunnsstraff, med ei gjennomføringstid på 120 dagar. Subsidiært fengsel i 45 dagar.

I skjerpande retning la retten vekt på at ugjerninga gjekk føre seg over ein lengre periode, og at det gjekk tid før nokon vart tekne for forholdet. Det påførte kollegaene på arbeidsplassen ubehag og frykt for å verta mistenkte for lovbrotet.

I formildande retning la retten vekt på at kvinna tilstod, og at ho var i ei livskrise då gjerningane fann stad.