– Tilskot har krympa

Det går fram av ein søknad frå vikar for dagleg leiar Grethe Galtung Johannesen og styreleiar Kari Mostad.

I budsjettframlegget for 2023 har rådmannen ikkje tilrådd å auka tilskotet som ynskt. Det står på lista over ynske som ikkje er finansierte.

Rammetilskotet frå staten har auka dei siste åra, medan tilskotet frå heradet har minka sidan 2019. Då bidrog heradet med 826.000 kroner. I 2022 hadde beløpet sokke til 792.000 kroner. På grunn av prisauken har handlingsrommet vorte redusert med 136.000 kroner dei to siste åra, hevdar Grannehjelpa. Dei siste fire åra har laget fått 1,24 millionar kroner i året frå staten og heradet til saman.

Eit stort lyft skjedde i 2013, då prosjektet Aktivitet for eldre på institusjon vart endra til permanente stillingar på 160 prosent. Dette har betydd mykje for laget, som er takksamt for samarbeidet med heradet, opplyser Johannesen og Mostad.

Grannehjelpa har basert mykje aktivitet på ekstern prosjektstønad, som har gjort at ein tidvis har hatt eit mykje høgare aktivitetsnivå enn stillingane på 160 prosent tilseier. Forskrift om tilskot til frivilligsentralar seier at ein frivilligsentral skal ha minst eitt årsverk, som hovudregel ein person i 100 prosent stilling.

Laget slit, som alle andre, med høge energikostnader, trass straumstønadsordninga for frivillige organisasjonar. Lokala i 2. høgda i Sandvenvegen er gratis å leiga, og gamleskulen på Norheim vert leigd ut rimeleg. Her har fleire dugnadsgjengar oppgradert lokala og halde dei ved like.

Frivilligsentralen ynskjer sjølvfinansierande drift av gamleskulen. Grannehjelpa ynskjer seg oppgradering av ei varmepumpe og ein buffer for å betala straumrekningar. Alternativt vurderer laget å be om at huseigaren, Kvam herad, tek ansvar for bygget igjen.