Tilrår snøggtest ved svake symptom
Tilsette i barnehagar og på 1. til 4. trinn i barneskulen i Kvam kan bruka hurtigtestar for koronaviruset.
Det er konklusjonen frå kommuneoverlegen etter at han, saman med assisterande smittevernlege og leiar for helsestasjon og skulehelsetenesta, har vurdert om gruppene tilsette kan nytta hurtigtest. Det kan vera aktuelt i dei tilfella der tilsette lurer på om dei kan gå på jobb på grunn av lette luftvegssymptom som sår hals og hås stemme.
Det skriv oppvekstsjefen i Kvam herad, Astrid-Anett Steine, i eit brev til barnehagar og barneskular i heradet.
Grunngjevinga for grensa på 4. trinn heng saman med at dei minste borna er mindre smittsame og mindre mottakelege for covid-19-viruset enn eldre born.
Tilsette skal testa seg sjølve med hurtigtest på jobb to etterfølgjande dagar for å fanga opp smitte av covid-19 tidlegare, og for å halda oppe stabil drift av barnehagar og skular.
Dersom tilsette kjenner at dei ikkje er heilt friske, skal dei halda seg heime. Desse skal ikkje ta hurtigtest. Tilgangen på hurtigtestar er avgrensa, og difor er det viktig at testane vert brukte til dei tilsette som i utgangspunktet kjenner seg friske, men har svake luftvegssymptom og trur at dei kan gå på jobb.
Alle med positive hurtigtestar skal isolerast og testast med PCR.
Dersom testinga belastar beredskapslageret til heradet for mykje, vil ordninga opphøyra.
