Tilrår konsesjon til lineflytting
Vestland fylkeskommune fann ingen kulturminne i området i ålvikfjella der Statnett planlegg å flytta 5,5 kilometer av kraftleidningen Sima–Samnanger.
Fylkeskommunedirektøren rår til at Statnett får konsesjon til tiltaket, som del av ei fråsegn til konsesjonssøknaden som fylkesutvalet drøftar 6. september.
Endringa vil medføra at leidningen vert lagd noko lenger ned i terrenget, gjennom Tjørnadalane. Noverande trasé går over Pyttafjellet.
Det er tidlegare påvist automatisk freda kulturminne nær tiltaket ved Bjørkeviki vest for Bjølsegrøvatnet. Seksjon for kulturarv ved fylkeskommunen gjennomførte ei kulturhistorisk registrering der lina no etter planen skal gå, utan resultat.
Administrasjonen meiner at det er bra at Statnett flyttar 420 kilovoltslina Sima–Samnanger. Den eksisterande lina har, sidan ho vart sett i drift i 2013, vore prega av høg risiko for utfall på grunn av store islaster. Bergensområdet er avhengig av kraftlina for at kraftsystemet i regionen skal fungera godt, skriv fylkeskommunen.
Statnett har søkt om etablering og bruk av fem mellombelse anleggsplassar og om mellombels bruk av ein eksisterande veg. Det vil verta behov for noko køyring i terrenget og nokre stader graving og tilrettelegging for å gjera transporten mogleg. Skog i leidningstraseen vil verta rydda. Det kan verta behov for rydding av landingsplassar for helikopter og mellombels riggplassar for trommel og vinsj i anleggsperioden. Statnett ynskjer å oppnå frivillige avtalar med alle grunneigarane. Elles vil oreigning verta aktuelt.
Statnett reknar med å spara store summar på omlegginga av kraftlina i form av meir stabil kraftleveranse.
