Tilrår ikkje straum på billegsal til alle ullensvangarar

Ifylgje ei pressemelding frå R vil partiet i kommunestyremøtet torsdag føreslå sal av konsesjonskraft til næringsliv og innbyggjarar til den nemnde prisen frå nyttår. Til HF opplyser Kollbotn vel å merka at framlegget kjem til å gå ut på å greia ut ordninga til neste møte i november.

– Då får alle stabile og rimelege kraftprisar, og kommunen får likevel stabile og gode inntekter. Dette vil gjera Ullensvang endå meir attraktiv, skriv R.

Partiet vil altså gå lenger enn kraftutvalet og rådmannen, som vil nytta konsesjonskraft til å tilby berre næringslivet fastprisavtalar på «marknadsmessige vilkår».

Ottast regelbrot

Fullt så enkelt er det kanskje ikkje. Rådmann Ole-Jørgen Jondahl har føreslege nettopp «marknadsmessige» vilkår for å unngå at kommunen frontkolliderer med ESA-reglane for såkalla bagatellmessig offentleg stønad. Risikoen ligg ifylgje han hjå mottakarane, som eventuelt må betala tilbake stønad med renter om regelverket vert brote.

Dei generelle reglane seier at verksemder ikkje kan få meir enn om lag 1,9 millionar kroner i samla offentleg stønad over tre år. Jondahl trur ein pris på 35 øre kan koma til å bryta reglane, basert på råd han har fått frå advokatar i Landssamanslutninga for vasskraftkommunar (LVK).

Desse råda er ikkje del av sakspapira. HF har onsdag bede om å få tilgang til dei.

– Advokatane sitt klare råd er kommersielle fastprisavtaler. Regjeringa har lagt terskelen på 70 øre. Vår oppfatning er difor at alle avtalar på minst 70 øre vil vera innanfor ESA-regelverket, skriv Jondahl i ein e-post til HF etter å sett pressemeldinga frå R.

Rådmannen oppmodar lokalpolitikarane om å overlata straumprisane til privatpersonar til nasjonale styresmakter, slik at prisen ikkje avheng av postnummer. Dagens ordning, der staten dekkjer 90 prosent av kostnaden med kraft over 70 øre per kilowattime, meiner han i hovudsak er god.

Meiner rådmannen tek feil

Kollbotn, som opplyser at han har drøfta saka med advokatar, meiner rådmannen tek feil. Han forstår ikkje kvifor ei ordning som er nedfelt i lov om konsesjon for rettar i vassdrag sidan 1917, og som kommunar har nytta i årevis til å selja konsesjonskraft med eit lite påslag, brått skal vera problematisk. Han hevdar at kommunane står fritt til å forvalta konsesjonskrafta som dei vil.

Politikaren viser til at situasjonen er ekstraordinær, og meiner at kommunestyret tidlegare har fått tilbakemelding om at det i alle fall i slike situasjonar er høve til å senka prisen utan å bryta reglane.

– Regjeringa og Stortinget leverer ikkje trygge og langsiktige løysingar for innbyggjarane. Det er på tide at me viser veg og viser at dette er mogeleg, seier han.

Kollbotn understrekar at framlegget torsdag berre går ut på å få saka greidd ut. Både juridiske og økonomiske sider må greiast ut til neste møte, før konsekvensane av ordninga eventuelt kan bakast inn i budsjettet, seier han.

R meiner kommunen må ta drastiske grep raskt for å hjelpa folket med å betala straumrekningane. Partiet viser til at ei oppmoding frå kommunestyret i vinter om ein maksimalpris på 45 øre ikkje har ført fram.