Tilrår ein tidel av snøkanonsum
Visitfonna AS bad om 6 millionar, men må truleg nøya seg med 0,6 millionar kroner til snøkanonar til å sikra lengre skisentersesongar og byggja opp isbreen.
Søknaden vert drøfta av plan- og driftsutvalet i Jondal kommune måndag. Rådmannen viser til at retningslinene for fondet tilseier at ein ikkje bør yta meir enn halvparten av samla kapitalbehov til private føretak. Dessutan seier føringane at dei som søkjer om meir enn 0,5 millionar kroner, fyrst skal avklara mogeleg stønad frå Innovasjon Noreg eller andre regionale stønadsordningar. Det er ikkje gjort.
Må opp i ESA
Rådmannen minner om at Folgefonna velkomstsenter AS i fjor fekk 1,7 millionar kroner frå fondet. Ei verksemd kan berre få inntil 0,2 millionar euro i ein treårsperiode etter løyving av såkalla bagatellmessig stønad. Selskapet er eigt av Visitfonna, og dei to vert difor rekna som same føretak.Om dei folkevalde gjev den tilrådde summen, må ESA godkjenna løyvinga etter EØS-reglane.Søkjaren ynskjer at kommunen skal stå som søkjar om spelepengar til prosjektet. Rådmannen minner om at søkjaren vil stå som eigar av anlegget og vera ansvarleg for drift og vedlikehald i 30 år. Om Visitfonna ikkje gjer jobben, må Ullensvang kommune betala tilbake pengane.Skal kommunen vera søkjar, bør ein tydeleg avtale liggja til grunn, meiner rådmannen.Han tvilar på at delinga av prosjektet i to delar – snøkanonar og vasstilførsle – vil verta akseptert i spelestønadsøknaden. Anlegget vil difor truleg berre få éin million kroner i stønad, spår rådmannen.Ettersom søknaden lyder på meir enn 0,1 million kroner, skal kommunestyret avgjera saka.
Ei rekkje søknader
I innspurten av Jondal kommune har det fløymt inn søknader om stønad frå fondet. Alle vert handsama av utvalet måndag. Tilrådingane er som følgjer:• Jondal bil AS får 130.000 kroner til eit tilbygg. Søknaden lyder på 300.000 kroner.• Bjarne Guntveit får 50.000 kroner til Jondal sag. Søknaden lyder på 95.000 kroner.• Liv Sollesnes får 65.000 kroner til ny driftsbygning på gard nummer 15/1 på Solesnes. Søknaden lyder på 150.000 kroner.• Godtskalk Aarsand får 10.000 kroner til bakkeplanering på gard nummer 44/1. Kostnadsoverslaget er på 300.000 kroner.• John Arvid Underhaug får 12.000 kroner til nydyrking på gard nummer 30/1.• Hans-Olav F. Gausvik får 32.000 kroner til nydyrking på gard nummer 42/1, og 50.000 kroner til kjøp av mjølkekvote.• Gunnlaug F. Joakimsen får 62.000 kroner til nydyrking på gard nummer 16/2 og 18/4.• Bringebærhaugen samdrift DA får 30.000 kroner til kjøp av mjølkekvote.• Helge Arne Espeland får 50.000 kroner til kjøp av mjølkekvote.• Grønn markedskontakt AS får avslag på søknaden om stønad til Grepahuk-prosjektet i Herand. Søknaden lyder på 1 million kroner. Rådmannen meiner summen er høg med tanke på kor langt prosjektet er kome, og oppmodar søkjaren om å be om å få utbetala dei tidlegare løyvde 25.000 kronene før han søkjer om ny stønad.
