Tilrår å hjelpa Ukraina
Hardangerrådet kan gå saman med Haukeland universitetssjukehus og ein nystarta hjelpeorganisasjon om helsehjelp til Ukraina.
Rådet drøfta i rådsmøtet 23. juni om medlemskommunane skulle samla seg om eitt felles hjelpeprosjekt for Ukraina. Kvam heradsstyre vedtok nyleg å venta med eit samarbeid med Lesja og Marijampole om eit anna prosjekt, nettopp fordi regionrådet er i ferd med å slutta seg til ei anna løysing.
Sidan har dagleg leiar i rådet, Jostein Eitrheim, og ordførar i Eidfjord, Anved Johan Tveit, fått ei orientering frå avdeling for internasjonalt samarbeid på Haukeland om eit prosjekt som regionrådet er velkome til å slutta seg til.
I eit framlegg til vedtak i rådet fredag heiter det at Hardangerrådet sluttar seg til hjelpeprosjektet HMM Helsehjelp til Ukraina og vel dette som sin kanal for humanitær hjelp til Ukraina.
HMM Helsehjelp til Ukraina vart starta av Tor Fredrik Müller og Paal Christian Mowinckel i Bergen i mars. Dei tok kontakt med Haukeland om moglegheita for å samla inn medisinsk utstyr til støtte for Ukraina. Mowinckel stiller med gratis lagerlokale sentralt i Bergen, og Müller dekkjer alle transportkostnader frå Bergen til Ukraina.
Avdelinga på Haukeland koordinerer innkjøp av utstyr og bidreg med administrativ støtte til prosjektet. Avdelinga har lang erfaring med både akutt bistand og langvarige samarbeid med helseaktørar i utlandet.
Fram til månadsskiftet september–oktober har hjelpeorganisasjonen sendt åtte ladningar med medisinsk utstyr til Ukraina. Det har vorte kjøpt inn mykje fyrstehjelpsutstyr til soldatane ved frontlina og fire bilar. Ein har fått donert ein respirator, og arbeider med å få tak i utstyr for å starta ei mobil operasjonsstove. Det har vorte samla inn meir enn 1,9 millionar kroner frå næringslivet og privatpersonar i Bergen.
– Prosjektet pågår for fullt, og aller siste nytt er at me førre helg sende to landcruisarar som var fullpakka med både medisinsk forbruksmateriell, medisinsk utstyr og vinterdekk. Bakseta i bilane vart fjerna, då ein skal setja inn bårer for å frakta såra soldatar, opplyser fyrstekonsulent i avdeling for internasjonalt samarbeid på Haukeland, Camilla Skjelbred, i eit straumbrev til HF.
