Tilbyr laurdagskos til sushielskarar
Frå ein kjellar på Fykse har Diane Cao Zheng og mannen Jacky Zheng forsynt kvemmingane med sushi i to år.
Ekteparet har andre jobbar, og sushien vert berre laga og seld på laurdagar. Diane Cao Zheng fortel at ho alltid har vore glad i sushi. Etter at ho flytta frå Bergen til Kvam, vart det ikkje like lett å få tak i god sushi. Difor bestemde ho seg for å prøva seg som sushikokk.
– Eg er sjølvlært og har brukt mykje tid på å sjå sushi-filmar på YouTube. Dessutan har eg laga mine eigne variantar. Etter kvart vart eg så flink at eg byrja laga sushi til venner og kjende. Dei sa at den var så god at eg burde byrja selja, fortel ho.
Koronapause
Då Noreg vart «koronastengt», vart ektemannen permittert. Ho føreslo at han kunne fylla dagane med å byggja sushikjøkken i kjellaren.
Sushi Hjørna vart etablert. Verksemda har levert hentesushi sidan sommaren 2021. Den første tida vart det berre produsert sushi annankvar laurdag, og ho laga all maten åleine. Det vart ein pause då ho først fekk covid og sidan long covid. I oktober i fjor vart han overtala til å hjelpa til på sushikjøkkenet. Sidan har verksemda tilbydd sushi kvar laurdag.
– Ofte har han gjort det meste av arbeidet, medan eg berre har orka å pynta sushiane. For kort tid sidan klarte eg for første gong etter sjukdomen å gjera alt arbeidet sjølv, fortel ho.
Brukar nettet
Kundane tingar via ei nettløysing. Bestillingane må koma seinast fredag ettermiddag, slik at ekteparet veit kor mykje råvarer som skal kjøpast inn. Kundane kan som regel velja mellom to boksar som kvar har ei blanding av ulike betar. Innhaldet i boksane varierer frå veke til veke. Sushien kan hentast anten i huset på Fykse eller i Øystese.
Etterspurnaden varierer frå veke til veke. På det meste har Sushi Hjørna selt 36 boksar, på det minste berre to.
Ny konkurrent
Zheng har fått med seg at Barmen AS skal starta sushirestaurant i Norheimsund. Ho ser ikkje bort frå at det vil påverka etterspurnaden etter sushien til Sushi Hjørna.
– Eg veit ikkje kva som skjer i framtida, men eg håpar folk likar sushien min så godt at dei held fram med å kjøpa den. Skulle det enda med at me må leggja ned, er ikkje det så farleg. Dette er hobbybasert og ikkje det me lever av, seier ho.
Ho har ingen planar om å utvida og laga sushi fleire dagar i veka.
– Eg har ein annan jobb eg likar veldig godt. For meg held det å laga sushi på laurdagane, seier ho.
