Tilbyr «fuktig» vestlandsrute

Bak prosjektet «Norwegian Cider Route – West Coast» (NCR-WC) står næringsorganisasjonen Hanen. Organisasjonen samarbeider med Siderklynga Hardanger. Prosjektet skal ikkje berre laga ei rute siderinteresserte kan følgja, men også hjelpa siderprodusentane langs ruta med å verta flinkare til lokka turistar med spanande opplevingar.

11.–12. mars samla siderprodusentar frå vestlandsfylka seg på Hardangerfjord Hotel i Øystese for å drøfta korleis dette kan gjerast.

Ifølgje Bernt Bucher-Johannessen, dagleg leiar i Hanen, var om lag 25 personar til stades på samlinga.

Digitalt kart

– Kva opplevingar kan siderprodusentar tilby?

– Det kan eigentleg vera kva som helst. Det mest opplagde er omvisingar på garden der gjestene kan oppleva frukthausting og siderproduksjon på nært hald. Ei anna løysing er sjølvsagt sidersmaking, gjerne saman med servering, seier Bucher-Johannessen.

Siderruta skal gå frå Stavanger lufthavn Sola til Ålesund. Eit digitalt kart på nettstaden siderlandet.no skal syna turistane vegen. Nettstaden finst allereie, men inneheld i dag berre informasjon om siderprodusentar og produkta deira. Planen er å leggja ut informasjon om andre tilbod rundt siderprodusentane.

– Til dømes er Spildegarden med i prosjektet. Når turistane finn Spildegarden på kartet, skal dei ikkje berre få vita om opplevingane Spildegarden tilbyr, men finna informasjon om hotella i Kvam og om andre aktuelle opplevingar for turistar, seier Bucher-Johannessen.

– Betre økonomi

– Kvifor skal siderprodusentar jobba med opplevingar?

– For å få meir inntekt og betre økonomi. Det norske lovverket gjer det utfordrande å vera alkoholprodusent. Alkoholprodusentar kan ikkje reklamera på same måte som andre landbruksprodusentar.

– Korleis skal de hjelpa siderprodusentane?

– For det første må dei sjølve sjå verdien av å tilby opplevingar. Me skal også gje dei råd til kva dei kan gjera, syna dei kva andre gjer, og minna dei på at det er mogleg å samarbeida med andre i nærleiken.

– Kva kom ut av samlinga i Øystese?

– Eg trur samlinga vart ei realitetsorientering for mange produsentar. Dei fekk vita meir om kva krav som vert stilte når ein skal utvikla opplevingane.

Eit EU-prosjekt

NCR-WC er ein del av EU-prosjektet BASCIL. Målet med BASCIL er å laga kulinariske pakkereiser.

NCR-WC har fått om lag éin million kroner frå BASCIL. Bucher-Johannessen håpar prosjektet skal få stønad frå Innovasjon Noreg.

– Kva skjer vidare?

– No skal me senda ut eit spørjeskjema til produsentane for å få meir informasjon. Målet er å få siderruta og informasjonen me får frå produsentane inn på siderlandet.no i løpet av kort tid. Så skal opplegget testast i sommar, slik at me får sjå kva me eventuelt må arbeida meir med.

Bucher-Johannessen fortel at prosjektet NCR-WC vert avslutta i 2025, men Hanen skal halda fram med å oppdatera og utvikla informasjonen på nettsida også etter 2025.