– Tilbodet til festglade unge er for dårleg

Bergensaren Steffen Vike Holm er dagleg leiar i den ferske verksemda.

– Diverre er det lite som skjer på Kvamskogen på kveldstid. Dei unge tykkjer rett og slett at det er for keisamt og dreg heller til Geilo eller Hemsedal enn til Kvamskogen. Dette har me tenkt å ta tak i. No må me få ungdomen tilbake til Kvamskogen, seier han.

Håpar på påsken

Initiativet til Kvamskogen Afterski tok han og hyttenabo Vetle Vambheim Steffensen. Dei har fått AS Kvam Fjellheisar, verksemda bak Furedalen Alpin, med på laget.

Holm fortel at Kvamskogen Afterski skal vera ein stad der folk kan samlast etter skituren for å lytta til livemusikk og få seg noko å drikka.

– Det vert rett og slett ein liten pub for dei som er på fjellet, seier han.

Arbeidet med å ta kursa ein treng for å få dei naudsynte løyva, er i gang. Om alt går i orden, vil Kvamskogen Afterski vera open to–tre dagar i påsken. I første omgang skal samlingsstaden vera i eit telt på parkeringsplassen i Furedalen.

– Er etterspurnaden stor nok, kan det etter kvart verta permanent. Me må rett og slett berre sjå om folk tykkjer dette er kjekt, seier Holm.

Tanken om å starta afterski på Kvamskogen har vore lufta på Facebook.

– Me skreiv eit innlegg i påsken i fjor. Det fekk ein haug med kommentarar. Nokre er skeptiske og hevdar at Kvamskogen skal vera ein fredeleg plass, der det ikkje er plass til ein afterski, men dei fleste var positive, fortel Holm.

– Trur det er ein marknad

Dagleg leiar i AS Kvam Fjellheisar, Jan Guttorm Skeie, fortel at det allereie i 2018 vart teikna eit nytt bygg til skisenteret. Tanken var å bruka det til restaurant og afterski.

– Me skulle bruka vinteren 2019 til å planleggja arbeidet, slik at bygginga kunne byrja i 2020. Med tanke på koronapandemien og dei nedstengingane den førte med seg, vart det heldigvis ikkje noko av, seier han.

Skeie fortel at Holm og Steffensen tok kontakt i påsken i fjor og fortalde at dei sakna eit afterskitilbod.

– Dei hadde høyrt rykte om at me nyleg hadde jobba med dette, og lurte på om me skulle prøva å få til noko saman. Me bestemte oss for å klinka til og prøva, fortel han.

I første omgang skal eit om lag to hundre kvadratmeter stort telt hyrast inn. Dersom tilbodet viser seg å falla i smak, er planen at ein etter kvart skal reisa det planlagde bygget.

– Det er mykje folk på Kvamskogen. Eg trur det er ein marknad for dette, seier Skeie.