Frå venstre: Halvor Økland, Hermund Vigerust Endreson Furu, Ulrik Fosso og Hermon Tesfatsion stilte kampklare opp for fotografen.

Tilbaud borna eventyrleg leik

Førre veke vart det observert alvar, dvergar, hekser og handelsfolk i skogen i Ålvik.

Tomas Selvik Undal
Publisert Sist oppdatert

– Ein må tora å sleppa seg litt laus og leika, i staden for å berre sitja inne spela, fortel Monika Krutå Johansen i Ung fritid.

Torsdag 12. august arrangerte Ung fritid, som er eit samarbeidsprosjekt mellom Kvam herad, Grannehjelpa og ulike frivillige lag og organisasjonar i Kvam, eventyrspel for aller fyrste gong. Ifylgje Johansen hadde ingen av dei tilsette erfaring med spelet frå før.

Sofie Milasauske (t.v.) og Øyvor Lid Mæland slo seg, bokstavleg tala, laus.

Eventyr i røynda

Hermund Vigerust Endreson Furu var ein av arrangørane. Til vanleg arbeider han ved Tolomarka omsorg. Furu fekk auga opp for eventyrspel fyrst då han merka kor mykje ungane hans sat framføre skjermen.

– Eg sat heime og registrerte at dei heldt på med store mengder dataspel, seier han.

Furu tenkte attende på sin eigen barndom. Som liten leika han indianar og cowboy i skogen. Familiefaren ynskte å finna tilbake til leiken. Levande rollespel, også kalla laiv, vart løysinga.

I eventyrspelet har deltakarane ei rolle i ei fiktiv verd. Der finst det både magi, ulike skapningar og skjulte skattar.

Levande rollespel er ei form for improvisert dramatisering som går føre seg utan publikum. Furu har drive med aktiviteten i 12 år. Ifylgje han er det mange som har teke del i leiken.

– I Bergen kom det nokre gonger 120 born på spela, fortel Furu.

Arrangør Hermund Vigerust Endreson Furu er oppteken av at borna skal vera meir ute og leika, og sitja mindre framføre skjermane.

Nye spelarar

I fjor flytta han til Ytre Ålvik. No ynskjer han å engasjera born og unge i Kvam. Han påpeikar at det er mykje flott natur i heradet som kan eigna seg for laiv.

Furu ynskjer å gje born eit tilskot til fritidstilbodet, der dei skal få moglegheita til å oppleva gleda av å vera i naturen.

– Ein kan køyra forbi leikeplassar på solskinsdagar utan at ein ser eit einaste barn. Kvar er dei? undrar Furu.

Gabriel Johannesen Sandvik var ein av dei vaksne som tok del i spelet. Oppgåva hans var å engasjera dei unge deltakarane.

16 born deltok på eventyrspelet i Ålvik. Dei kom frå Norheimsund, Øystese, Ålvik og Fykse. Furu hadde henta kostyme og rekvisittar frå organisasjonen Tidsreiser AS, som held til i Bergen. Eventyrspelet hentar inspirasjon frå mellomalderen og fantasi og har mange ulike roller.

Alvar, grådvergar, hekser og handelsfolk er kvar sine lag, men spelar også saman. Dei fiktive figurane har ulike roller. Grådvergane skal for eksempel byggja ut verda, medan handelsfolka prøver å skaffa seg dyrebare skattar. Ein tel ikkje poeng, men spelet endar med ein kamp mellom dei vaksne og borna.

– Den avsluttande kampen plar borna vinna, poengterer Furu.

Fleire av borna stod samla og diskuterte. Kanskje dei la ein plan for korleis dei skulle vinna kampen mot dei vaksne?

Han hadde med seg ni vaksne arrangørar. Dei engasjerte borna som deltok ved å tre inn i fiktive roller som ulike figurar.

Lokalt tiltak

Dei tilsette ved Ung fritid syrgde for transport og mat til deltakarane. Ved ein lavvo kunne deltakarane henta snacks og drikke. I tillegg vart det servert grillmat.

Eventyrspelet var det nest siste tilbodet som Ung fritid arrangerer denne sommaren. Johansen fortel at paintball og klatring var to av dei mest populære aktivitetane i sommar. Ifylgje henne ynskjer Ung fritid å tilby arrangement som alle kan vera med på.

– Alle tilboda våre er gratis. Målet er at alle skal få moglegheita til å gjera noko kjekt i ferien, seier Johansen.

Monika Krutå Johansen og Halvard Sagen Tholo var mellom dei vaksne som tok del i eventyrspelet i skogen i Ålvik.
ålvik spel nyhende fritid
Laga med Labrador CMS