Tilbake etter 40 år: – Det er eit godt miljø å vera i

– Det vert ikkje betre enn dette, seier konferansier og fordentusiast Per Christian Hove Ødegård når HF er innom Ford M Klubb sitt 40-årsjubileum på Hardangerfjord Hotel laurdag føremiddag.

Samstundes formeleg strøymer det på med bilar. «Høgre, høgre», høyrer me frå primus motor Arvid Indrehus, som viftar med armane og dirigerer bilane til rett stad.

Det er litt av eit puslespel som skal setjast i hop i hotellhagen ved Hardangerfjorden. Like bilar bør stå samla, og i tillegg må det tenkjast på kven som skal av garde fyrst og sist morgonen etter.

At også medlemsmassen har vorte 40 år eldre, kan sjåast på rygginga, meiner konferansieren.

– Ei stor oppleving

Bilar og folk har nytt av finvêr og fasilitetar i Kvam sidan torsdag. Indrehus hadde håpa å samla over 100 bilar, og slik vart det. Han er svært nøgd med arrangementet. At så mange kom, trur Indrehus skuldast at treffet markerer eit jubileum, og at det har vore godt marknadsført.

– Og dei som har vore her før, elskar jo Øystese og Hardanger! Det er ei stor oppleving for dei å vera her, seier han.

Deltakarane har teke turen frå Berlin i sør til Brønnøysund i nord.

Sjå bilete frå biltreffet her:

Trefte att gamal «kjenning»

Mellom blankpolerte panser og skinande felgar slo HF av ein prat med Odd Eriksen. Bilentusiasten frå Drøbak var til stades også på det fyrste biltreffet klubben arrangerte.

Året var 1984. Den gong køyrde Eriksen vestover saman med dåverande kjærast, Hilde, og kameraten Trym. Sistnemnde var sjåfør i sin Ford 20M XL Hardtop frå 1969.

Hjula til historia rullar framleis. Laurdag trefte Eriksen att bilen han kom køyrande i for 40 år sidan. I dag er bilen eigd av Oddbjørn Jenshus. Om lag 400 kilometer la han bak seg for å koma til Øystese.

I dag kan nær sagt kven som helst få nyss i kvar det vert arrangert biltreff. Då Eriksen fekk nyss i biltreffet i 1984, var det kameraten Trym som hadde lese om V6-klubben som var starta i Ålvik.

– Det tykte me var litt spennande, fortel han.

Kameraten ringde Indrehus for å høyra litt meir, og så bestemte trioen seg for å ta turen i V6-aren.

– Berre måtte ha ein

Korkje Eriksen, kameraten eller kjærasten visste så mykje om kva dei kom til, men dei vart godt tekne imot, minnest han. Gjengen vart innlosjert på det som då heitte Kvandal Kro og Camping «på beste måte», av mor til Indrehus, som arbeidde der. Sidan har Eriksen vore tilbake i Hardanger ved fleire høve.

Eriksen kom køyrande i ein 17M RS Hardtop denne gongen. Han var «ute av gamet» i rundt tjue år før han tok tak i gutedraumen att for om lag ti år sidan, fortel han.

– Eg måtte berre ha ein slik att. Eg jobba med bilen i to år for å få han køyrbar. I dag er han bra, meiner han.

– Det er eit godt miljø å vera i, og trivelege folk ein møter på, legg han til.

Lang, lang rekkje

Om ikkje du såg i doningane i hotellhagen i Øystese laurdag, fekk du kanskje eit glimt av dei fredag ettermiddag. Då var gjengen på sigetur frå Øystese til Fyksesundbrua, tilbake over Porsmyr og så via gamlevegen til Norheimsund. Eller «over fjellet», som den utflyttar Indrehus kalla det.

Sjå bilete frå råninga her:

Ein stopp var planlagd ved Steinsdalsfossen, men der vart det for fullt og krøll for turistbussane. Då floken var løyst opp, gjekk turen tilbake til Øystese, og enda hjå Leif Gjerde på Øystese Mek. Verksted AS. Der vart kvar modell, og nokre av dei meir spesielle versjonane, som kabrioletar og italienskbygde Ford OSI, stilte ut og vist fram.

Her er ein video Ståle Byrkjeland har laga for og frå arrangementet:

Også Gjerde har hatt mykje å bety for klubben og entusiastane, meiner konferansier Ødegård. Mange pussa opp bilane sine hjå Gjerde på 1980- og 1990-talet, fortel han.

– Hadde ikkje Leif hatt den fordforretninga, hadde me ikkje stått her no.