Til Oslo for å demonstrera
Guro Stuve frå Kvam heiv seg på toget då bøndene skulle visa regjeringa kva dei meiner om jordbruksvilkåra.
Leiaren i Vikøy og Øystese Bondelag var truleg den einaste kvemmingen som tok turen austover for å vera med på demonstrasjonen utanfor Stortinget i Oslo torsdag.
Der var bønder frå fjern og nær samla for å gjera klart kva dei meiner om dei økonomiske rammevilkåra for bøndene.
Stuve reiste saman med andre bønder frå Hardanger og Voss. Det vart ein kronglete tur med tog, ettersom ein del av han gjekk med buss. Det var såleis ein litt sliten bondelagsleiar HF møtte på Løvebakken torsdag, då ho var på veg til kaffipause på Landbrukets Hus.
– Eg er litt skuffa over at ikkje fleire frå Kvam vart med, seier Stuve til HF.
Ho reknar med at tidspunktet kan ha hatt litt å seia. April er ein travel månad på grunn av både lamming og gyllespreiing, påpeikar ho.
Bakteppet for bondeopprøret er ei stortingsmelding om auka sjølvforsyning av jordbruksvarer i Noreg, som vart handsama av politikarane torsdag.
Noko av kjernen i konflikten er timetalet som vert nytta i årsverket til bøndene og den såkalla normeringsfaktoren, som er mellom nøkkelfaktorane i grunnlaget for det årlege jordbruksoppgjeret. Bøndene meiner enkelt sagt at inntekta deira ser betre ut enn ho eigentleg er. Også krav om effektivisering av drifta provoserer, fortel Stuve. Særleg gjeld det hjå dei bøndene som allereie har investert i nye bygg og ikkje har stort meir å henta.
– Kva fekk deg til å reisa til Oslo?
– Eg har eit engasjement for både andre bønder i Kvam og for meg sjølv. For meg handlar dette om spørsmålet om eg skal byggja fjøs eller ikkje. Eg kan ikkje byggja ei bedrift som går i minus. Mange går i minus og får tilskot nettopp fordi dei går i minus, og fordi maten ikkje skal vera dyr. Men så er han jo dyr likevel! seier Stuve oppgjeven på Løvebakken.
