Til nyttår er det slutt på Bakka

Anlegget på Bakka slaktar om lag 100 tonn fisk kvar dag. Kapasiteten på det nye anlegget vert om lag 250 tonn kvar dag, fortel dagleg leiar Knut Roger Sivertsen.

– I Langevåg vert alt heilt nytt og mykje større. Dessutan vert det nye anlegget meir automatisert. I Strandebarm bløggar dei tilsette til dømes fisken for hand. På Bømlo kjem ein robot til å ta hand om dette. Talet på tilsette vert om lag det same, men arbeidsoppgåvene vert endra. Det vert meir tilsyn og mindre handarbeid, seier han.

– Fleire vert med på flyttelasset

Dei om lag 35 tilsette i Strandebarm er ei blanding av fast tilsette og innleigde arbeidstakarar.

– Alle tilsette fekk tilbod om å vera med til Bømlo, men eg skjønar godt at det ikkje høver like godt for alle å flytta. Sju til åtte har takka ja til tilbodet. Ein del av dei andre fast tilsette har slutta og funne seg andre ting å gjera, fortel Sivertsen.

Utstyret vert ikkje med på flyttelasset.

– Utstyret er for lite og for gamalt for anlegget i Langevåg. Likevel trur eg at me skal finna nokon som vil kjøpa det, anten i Noreg eller i utlandet, seier Sivertsen.

HAFI er eigt av oppdrettsselskapa Fylkesnes Fisk AS, Eidesvik Laks AS, Lingalaks AS, Tombre Fiskeanlegg AS og eksportselskapet Norwegian Royal Salmon ASA. At slakteriet skal flytta, har vore kjent lenge. Eigentleg skulle flyttinga skje 1. oktober. Forseinkingar på anlegget på Bømlo gjer at aktiviteten held fram i Strandebarm lenger enn planlagt.

Ønskjer ny aktivitet

Dagleg leiar Erlend Haugarvoll i Lingalaks fortel at eigarane av HAFI ønskjer ny aktivitet på Bakka når slakteriet flyttar. Hardanger og Voss Næringshage AS har fått i oppdrag å laga ein moglegheitsstudie av anlegget.

– Det kan vera aktuelt for nokre av eigarane å bruka bygga på Bakka. Både Lingalaks og Tombre Fiskeanlegg har basar i området. Me kan sjølvsagt bruka bygga til lager eller liknande. Det beste hadde likevel vore om det kom nye arbeidsplassar og ny verdiskaping i lokala, seier han.

– Har akkurat byrja jobben

Dagleg leiar i Hardanger og Voss Næringshage, Sigmund Vereide, fortel at arbeidet med moglegheitsstudien akkurat har byrja.

– Me hadde eit introduksjonsmøte like før sommarferien, og skal straks ha eit nytt møte der me skal leggja opp eit løp. Bygningen har kai og tilgang til fjorden. Mange av bygga har kjøle- og fryseanlegg. Det vert spanande å sjå nærare på kva anlegget kan brukast til. Me har erfaring med å laga denne typen moglegheitsstudiar, mellom anna frå arbeidet me gjorde med forprosjektet til det tomme meieriet i Øystese. Eg er optimist med tanke på å finna ny næringsaktivitet til bygga på Bakka, seier han.