Tidstypisk arkitektur — med solceller på taket?

Helge Karlsøen i Trånavegen i Villabyen i Ålvik har søkt Kvam herad om å få montera 29 solcellepanel på den sida av taket som vender mot sør. Det er rekna ut at han slik kan gjera bruk av kring 8.000 «gratis» kilowattimar i året. Den samla effekten kan verta 10.440 watt.

Ifylgje gjeldande reguleringsplan krev ei slik «fasadeendring» godkjenning av fylkeskonservatoren i Hordaland før heradet kan handsama saka.

— Med høge straumprisar som bakteppe må me pårekna ein auke i solcelle- og solfangarsaker, også i område og på bygg med arkitektonisk høg verdi, skriv rådmannen i eit notat.

Prinsipielle spørsmål

Bustadområdet i Villabyen har både ein tidstypisk arkitektur og eit heilskapleg preg, og er dermed gjeve vern gjennom gjeldande reguleringsplan for «Byen» frå 1993. «Byen» er dessutan ført opp på gul liste som prioritert kulturminne i den kommunale kulturminneplanen.

Byggjesaksavdelinga i heradet stiller fleire spørsmål i saka:

— Må solcelleløysinga i større grad spegla eksisterande takfasade? Kva med søknadar om solcelleløysingar som måtte koma på andre hus i verneområdet — må dei velja system med same uttrykk? Kanskje solcelleløysingar på tak ikkje kan godkjennast innan verneområdet? Eller at slik utvikling berre kan skje gjennom regulering?

Ber om synsing

Uansett meiner rådmannen at det bør leggjast fram ein arkitekturfagleg argumentasjon om korleis solcelle-«takfasaden» vil passa inn i verneområdet. Ho har bede fylkeskommunen om ei kulturfagleg vurdering og avgjerd.

I eit miljø- og klimaperspektiv er det ynskeleg at klimanøytrale energiløysingar vert tekne i bruk, skriv rådmannen. Låg fyllingsgrad i magasina og høge kraftprisar i vinter har aktualisert alternative energikjelder.

Å tillata solcelleløysingar på tak på bustadhus i vernesona i «Byen» Ålvik er likevel utfordrande, både med tanke på utforminga og bygget i seg sjølv og ut frå heilskapen i området, skriv rådmannen.

Fylkeskommunen har så langt ikkje gjeve tilbakemelding i saka.