Tidlege julegåver til teknisk
Teknisk eining får kjøpa den omdiskuterte liften og vaskeroboten.
Fleire relativt små investeringar vart heite tema som tok ein god del tid i budsjettdebatten, visstnok både i gruppemøte og i heradsstyremøtet 12. desember.
Ei av investeringane var beredskapsbåten til Kvam brann og redning, som fleirtalskoalisjonen berga, medan opposisjonen ville stogga handelen og erstatta fartøyet med ein billegare variant.
Det same utfallet vart det for liften og ein vaskerobot til Norheimsund idrettshall, båe investeringar for 1,25 millionar kroner. Båe vart tekne opp i spørsmål til rådmannen før budsjettmøtet.
Difor vil ho kjøpa
I eit notat til heradsstyret opplyser rådmannen fylgjande:
• Heradet har bruka lift kring 80 dagar det siste året, og etter sommaren er det nytta 100.000 kroner på leige av lift. I tillegg kjem interne kostnader med leiga. Røynslene med lokale leverandørar er blanda, mellom anna fordi den leigde liften stundom ikkje har fungert. Det er uvisst og vil ta tid å finna ut kva ein rammeavtale om bruk av lift vil kosta.
• Vaskeroboten trengst fordi den nye vidaregåande skulen og skulefritidsordninga fører til at hallen vert i bruka frå klokka 07 til 22 dagleg. Roboten skal vaska hallen, korridorane, garderobane og foajeen om natta, slik at dei tilsette slepp nattarbeid og tungt arbeid.
Varaordførar Frode Nygård (Frp) sa i debatten at rådmannen kunne ha sloppe støy og spørsmål dersom informasjonen hadde vore tilgjengeleg frå starten av. Han reknar med at kjøp og leige frå no av vert vurdert skikkeleg i kvart enkelt tilfelle.
Jostein Moldsvor (KrF) meiner at Kvam herad generelt bør vurdera leige i staden for eige. Årsaka er at det vil gagna næringslivet, noko som i neste runde kan gagna Kvam herad.
– Næringslivet må stå på eigne bein, men ein rammeavtale med heradet i botnen kan vera grunnlaget for å klara seg, sa han.
Ville stoppa det
Opposisjonen føreslo – utan hell – ein mellombels innkjøpsstopp for køyretøy og anleggsmaskiner til over 100.000 kroner. Ifylgje framlegget var tanken at formannskapet skal handsama eventuelle unntak frå forbodet. Slike unntak må vera godt grunngjevne av rådmannen. Målet var å sikra at berre dei mest naudsynte investeringane vert prioriterte.
Arne Sandven (H) fekk i haust fleirtal for å krevja eit oversyn over kostnader med og bruk av diverse kommunale maskiner og køyretøy. Det skildra han som tynt, til liks med behovsanalysen for belteliften som låg ved budsjettet. Med eigne og godt dokumenterte saker kan kvart innkjøp vurderast betre, meiner han.
Rådmann Anita Hesthamar påpeika at det er ressurskrevjande å leggja mange detaljar fram for dei folkevalde. Det kan difor vera lurt å bestemma seg for kva detaljnivå ein skal leggja seg på, og kva administrasjonen og politikarane skal bruka tid på, påpeika ho.
