Tidlegare ordførar vert kommunalsjef
Hans-Erik Ringkjøb er tilsett som kommunalsjef for tekniske tenester i Voss herad.
Det melde Voss herad i ei pressemelding måndag. Åtte søkte på jobben. Tilsetjingsutvalet var samla om Ringkjøb.
Han var ordførar i Voss i 12 år fram til i fjor haust, då han ikkje stilte til val.
– Alle kjenner bakgrunnen til Hans-Erik, men det er korkje kvalifiserande eller diskvalifiserande å ha vore ordførar. Hans-Erik var den beste kandidaten av dei som søkte, basert på faglege og personlege eigenskapar, og er eg glad for at han har takka ja, seier avtroppande rådmann Arild McClellan Steine.
Ringkjøb kjem frå stillinga som seniorrådgjevar i Vestland fylkeskommune. Han byrjar i Voss herad 1. april. Berre to veker seinare har Steine siste arbeidsdag i Voss, før han 1. mai vert rådmann i Bjørnafjorden kommune. Torbjørg Austrud er tilrådd som konstituert rådmann. Heradsstyret avgjer saka 21. mars, opplyser Voss herad.
