Tide Buss held fram i Hardanger
Tide Buss AS skal køyra bussane i Hardanger også dei neste åra. Med lågare utslepp enn før.
Den nye kontrakten gjeld i perioden 23. juni 2025–23. juni 2035, altså i ti år. Tide Buss danka ut Vy Buss AS og Firda Billag Buss AS i kampen om kontrakten, som ifylgje ei pressemelding frå Tide Buss har ein samla verdi på over 5,2 milliardar kroner. Han omfattar kring 5,6 millionar rutekilometer kvart år.
Planen er å kutta utsleppa med 90 prosent, noko som inneber at over fem millionar rutekilometrar må køyrast av vel 100 elektriske bussar. Klarar leverandøren det, kan kontrakten lengjast med tre år til 13 år.
– Elbussane tek endeleg steget frå byen til bygda. Dette er historisk. Miljøfyrtårnet Vestland lyser vegen, og eg er stolt over å vera fylkesordførar og vestlending i dag, skryter fylkesordførar Jon Askeland (Sp) i ei pressemelding frå Skyss fredag føremiddag.
– Stor dag
– Dette er ein stor dag for Tide, og me gler oss over å ha vunne kontrakten. Våre røter i Hardanger og Voss går heilt tilbake til 1880, og me er svært glade for at me skal få halda fram med å køyra rutebuss i regionen, seier konsernsjef Roger Harkestad i Tide i ei pressemelding frå transportselskapet.
Tide Buss skal driva bussane i kommunane Eidfjord, Etne, Fusa, Kvam, Kvinnherad, Samnanger, Tysnes, Ullensvang, Ulvik og Voss.
Kontrakten inneber at Tide framleis vil ha arbeidsgjevaransvar for 250 medarbeidarar som i dag er tilknytte anbodet, ifylgje Tide.
Betre vilkår
Anbodsrunden for buss er den fyrste i det nye fylket. I alt har fem tilbydarar vore med i kampen om oppdrag.
Kontraktane omfattar mellom anna krav om kollisjonssikring og styringsstøttesystem for å sikra sjåførane. I tillegg krev Skyss universell utforming for passasjerane og bonusordningar for både klimagassutslepp og for færre delte skift.
Modalen/Eksingedalen Billag AS er tildelt kontrakten i Modalen og Vaksdal, og Firda Billag Buss i Nordfjord. I desse områda er det kravd mindre utsleppskutt enn i Voss og Hardanger.
