«Tett på» kom litt for tett på

Dei næraste naboane – Kirsten og Arild McClellan Steine – til det nye bygget som skal reisast ved Hardanger fartøyvernsenter, er uroa over ulempene vindauga i bygget vil gje. Dei har hage, terrasse, soverom, gang og matstove vendt mot bygget, som på det minste ligg under ti meter frå eigedomen deira.

Medan saka ligg til avgjerd hjå Statsforvaltaren, har naboane i dei andre seksjonane i bygget slutta seg til og laga eit støtteskriv.

Kort tid etter at ekteparet Steine klaga på byggjeløyvet på grunn av innsyn frå Kulturnaustet – ein del av prosjektet «Tett på» – til eigen eigedom, vart klagen avvist av rådmannen. No prøver partane – Hardanger fartøyvernsenter (HVM) og naboane – å løysa saka med dialog.

Manglande tillit

Både i naboklagen og støtteskrivet, signert av Sigbjørn Mo, Erling Neteland, Gunnar Skeie og tidlegare nabo Alf Steine, går det fram at utfordringa gjeld plassering av vindauge og innsyn. Naboane set spørjeteikn ved framgangsmåten til Hardanger og Voss museum. Også kommunikasjon og tillit til byggjeprosessen er tema i skrivet.

I august sende utbyggjaren ut eit nabovarsel med endringar, då det godkjende tiltaket vart for dyrt. Med endringane kom også ein reduksjon i brystningshøgda – høgda frå golvet til kanten på vindauga.

Naboane reagerer på måten det vart gjort på. Dei hevdar det i eit møte våren 2022 var semje om at høgda skulle vera 1,5 meter, og at det ikkje skulle gjerast endringar i deira disfavør utan at dei vart særskilt varsla. Dei nye teikningane viser ei høgd på éin meter. Naboane kjenner seg narra og hadde venta meir frå ein seriøs aktør, skriv dei i brevet.

I dei siste teikningane er brystninga heva noko, til 1,25 meter. I tillegg vert det føreslege at resthøgda skal folierast, slik at grensa for utsyn vert 1,4 meter.

Julebrus, men ingen brus. Flaskepost, men ingen sjø. Utsikt, men ingen fjelltopp.

Snøgt handsama

Det tok rådmannen åtte dagar å handsama og avvisa klagen, som no ligg hjå Statsforvaltaren. Naboane er kritiske til tempoet.

– Har dei hatt tid til å setja seg skikkeleg inn i saka? undrast Kirsten McClellan Steine.

Medan saka ventar på avklaring, er det allereie sett i gang byggjearbeid, og det tidlegare Ica-bygget er rive. Kvam herad har oppmoda Statsforvaltaren om å handsama saka raskt.

23. november vart naboane kalla inn til møte med tiltakshavaren. Mellom anna gjenbruk vart drøfta. Då saka vart handsama, konkluderte rådmannen med at fordelane med gjenbruk og utvikling er større enn ulempene med innsyn. Det argumentet set naboane spørjeteikn ved.

Ifylgje Arild McClellan Steine vart det opplyst i møtet at materialane frå det gamle Ica-bygget er selde og køyrde vekk. Om det er skrive feil i vedtaket, og det viser seg at argumentet om gjenbruk ikkje gjeld, bør styresmaktene få vita dette, meiner han.

Positiv, men …

Naboane har bede om informasjon om kor mykje lys som må sleppast inn og kor mange og store vindauge som krevst for å sikra gode arbeidstilhøve.

I det kommunale vedtaket er det vist til at Arbeidstilsynet har gjeve samtykke etter automatisk sakshandsaming. Det reagerer grannane på. Med store vindauge mot deira eigedom meiner naboane at automatisk godkjenning i eit datasystem ikkje tek nok omsyn til ulempene for dei. Utbyggjaren bør informera om og retta seg etter minimumskravet, skriv dei.

Arild McClellan Steine understrekar at naboane er positive til utvikling av Hardanger fartøyvernsenter, men saknar ei jamvekt mellom ulempene og fordelane.

– Det er forståeleg at det er viktig med ein god arbeidsplass der dei tilsette har utsyn frå kontora, men det må vera ein balanse, seier han.

I dialogmøtet såg partane på ulike løysingar for høgd og foliering. Ifylgje Steine har utbyggjaren føreslege å halda på brystningshøgda på vindauga, men å foliera dei opp til 1,5 meter. Det er eit steg i rett retning, meiner han.

– Godt møte

HF har bede fartøyvernsenteret kommentera saka. Seniorkonsulent Geir Madsen opplyser at møtet og meiningsutvekslingane sist veke var gode, og at dialogen held fram. Han har ikkje svara på spørsmål som gjeld gjenbruk og påstanden om at det tidlegare var semje om ei anna løysing.

Madsen har tidlegare sagt at senteret har teke omsyn til naboane i den grad ein kan venta, og tilpassa bygget i lys av eigne behov.

Naboane har fleire gonger påpeika at dei ynskjer ei høgare plassering av vindauga. Dei har føreslege eit kompromiss der dei går med på foliering dersom høgda vert 1,6 meter frå golvet. Då vil ikkje dei tilsette på kontora sjå rett inn i 1. etasje og hage, men berre soveromma i 2. etasje, forklarar Steine.

– Ikkje kjent

Leiar for eining for plan og byggjesak, Heidi E. Ørjansen, opplyser at heradet ikkje er kjent med det om gjenbruk ikkje lenger er del av prosjektet. Ifylgje søknadane skal fasaden mot naboane ha same form som det gamle bygget. Den bakarste delen skal stå som før. Elles skal nesten heile bygget brukast om att etter sal av ståldragarar og fundament, utan at det er relevant for klagesaka.

Det som er relevant for grannane, er at fasaden ikkje vert endra frå den opphavlege fasaden.

– Når ein fyrst skal riva ståldragarane, så kunne ein i teorien ha endra meir på fasaden mot nabo når prosjektet ikkje må ta omsyn til det opphavlege bygget, skriv Ørjansen.

Kvam herad meiner folieringa er tilstrekkeleg til å hindra innsyn til naboane.

– Det er samtidig viktig at fartøyvernsenteret får gode og funksjonelle kontor med omsyn til lys og noka utsikt mot horisonten, skriv Ørjansen, som slår fast at det no er opp til Statsforvaltaren å ta stilling til dokumentasjonen i saka.